Elmar Baxşıyev: “Dayandığımız yerdə səhvlər baş verirdi”

“Oyundan öncə planımız o idi ki, qələbə qazanaq. Biz də başa düşürdük ki, sonuncu pillədən qurtulmaq üçün qələbə önəmlidir”.

Futbolxeber.az saytının məlumatına görə, bu sözləri "Qəbələ"nin baş məşqçisi Elmar Baxşıyev Azərbaycan Premyer Liqasının XVI turunda “Kəpəz”ə 0:3 hesabı ilə uduzduqları oyundan sonra deyib.  

O, problemin komandasında olduğunu bildirib: “Həftəlik tsikldə də futbolçuların istəkli olduğunu görürdük. Sadəcə, oyun istədiyimiz kimi alınmadı. İlk dəqiqələrdən düşündüyümüz tempi də görmədik. Problem özümüzdədir. Rəqibə qələbə qazanmaq üçün hər şansı verdik. Onlar da bundan istifadə etdi”.

O bildirib ki, rəqib “Qəbələ”nin səhvlərindən sonra aktiv olurdu: “Çempionat ortasıdır. İstək daha da yüksəlməlidir. Rəqibin də qələbəsinə kölgə salmaq istəmirəm. Bizim səhvlərdən sonra “Kəpəz” aktiv olurdu. Dayandığımız yerdə səhvlər baş verirdi. Ona görə də, deyirəm ki, səhv özümüzdədir. Özümüz bəzi şeyləri düzəltməliyik ki, daha yaxşı olaq”.

Baxşıyev yenilgiyə görə məsuliyyəti üzərinə götürüb: “Problem məndədir ki, komanda uduzur. Bu komandaya cavabdeh şəxs mənəm. Hər məsələyə açığam. Rəhbərlik də komandanı gücsüz görürsə, “Qəbələ” üçün ən yaxşısını etməyə hazıram”.