De Byazi: “Tək hücumçulardan yox, hamıdan qol gözləyirəm”

“Sabahkı oyunda uğurlu nəticə qazanmağa çalışacağıq. Komanda olaraq maksimum gücümüzlə oynayırıq, hətta daha artığını edirik. Heç kim deyə bilməz ki, meydanda əlimizdən gələni etmirik”.

Futbolxeber.az saytının məlumatına görə, bu sözləri milli komandamızın baş məşqçisi Canni De Byazi sabah AVRO-2024-ün seçmə mərhələsi çərçivəsində keçiriləcək Azərbaycan - İsveç oyunu öncəsi təşkil olunmuş mətbuat konfransında deyib.

İtaliya mütəxəssis bildirib ki, edilən səhvlər komandasına baha başa gəlir: “Təbii ki, mən də hər oyunda qələbə qazanmaq istəyirəm. Müdafiədə və ya hücumda səhvlər edirik, bu, bizə baha başa gəlir. Amma rəqibləri də nəzərə almaq lazımdır. Sabah qələbə qazansaq, qrupda İsveç millisinə çatmış olacağıq. Bunu reallaşdırmağa çalışacağıq. Ardından qrupdakı son oyun barədə düşünəcəyik”.

De Byazi 27 futbolçuya dəvət göndərməsinin səbəbini də açıqlıayıb: “Qısa müddətdə iki ağır oyunumuz olacaq. Hamıya şans verməyə çalışacağam. 27 nəfər çağırmağımın səbəbi də odur ki, 4 nəfər sarı vərəqə limitindədir. Onlardan kimsə sarı vərəqə alsa, növbəti görüşü buraxacaq. Heyətdə yalnız Emil Səfərovun ayağında problem var. O, əla futbolçudur, gələcəkdə milliyə çox xeyir verə bilərə. Təəssüf ki, İsveçlə oyunda oynaya bilməyəcək. Belçika ilə matça hazır ola bilər”.

O, bütün futbolçulardan qol gözlədiyini vurğulayıb: “Sabah tək hücumçulardan yox, hamıdan qol gözləyirəm. Hücumçu rəqib qapısına daha yaxın olduğu üçün qol vurmaq şansı çox olur. Yaxşı hücumçularımız çoxdur. Musaya çox ümid bəsləyirik, gənc oyunçudur. Azərbaycandan kənarda yeni təcrübəyə başlayıb. Çox yaxşı qol duyumu var. Xüsusən, cərimə meydanı daxilində yaxşı oynayır”.