Azad Rəhimov: "Futbolun inkişafına uşaq futbolundan başlamaq lazımdır"

Gənclər və idman naziri Azad Rəhimov “Bakı”nın yeniyetmə futbolçularının “Atletiko”nun düşərgəsinə yollanmasına münasibət bildirib. Futbolxeber.az-ın məlumatına görə, A.Rəhimov Azərbaycan idmanın gələcəyi üçün belə layihələrin vacibliyini qeyd edib: "Bütün klub rəhbərləri bilməlidir ki, futbolun inkişafına uşaq futbolundan başlamaq lazımdır. Çox təqdirəlayiq haldır ki, bu gün "Bakı"nın 5 futbolçusu "Atletiko"nun akademiyasına təhsil almaq üçün gedir. Həmin uşaqları təbrik edirəm. İnanıram ki, bu gənclər 2016-cı ildə 16 yaşa qədər futbolçular arasında keçiriləcək Avropa çempionatında bizi layiqli təmsil edəcəklər. Heç vaxt yaddan çıxarmamalıdırlar ki, futboldan başqa onlar İspaniyada Azərbaycanı təmsil edəcəklər. Onlar Azərbaycan tarixini yaxşı öyrənməlidir ki, İspaniyada bizi tanıda bilsinlər”.