Elmar Baxşıyev: “Bu mövsüm kubokun statusu daha ağırdır”

“Kubok oyunları həmişə çətin və ağır olur. Ötən il də bizim kuboka sahib çıxacağımıza inanan az idi. Əsas odur ki, oyunlara tam köklənəsən. Bu halda yaxşı nəticə qazanmaq mümkündür”.

Futbolxeber.az saytına müsahibədə bu sözləri “Qəbələ”nin baş məşqçisi Elmar Baxşıyev deyib.   

Turnirin son qalibi kimi bu gün keçirilən ölkə kubokunun 2023/24 mövsümünün püşkatma mərasiminə qatılan təcrübəli mütəxəssis qarşıdakı yarışın statusunun əvvəlki illərlə müqayisədə daha ağır olduğunu bildirib: “Bu il kubokun statusu daha ağırdır. Çünki kubokun qalibi Konfrans Liqasına yox, Avropa Liqasına yollanacaq. Bu da klublar üçün böyük stimuldur. Düşünürəm ki, hər bir klub əlindən gələni etməyə çalışacaq ki, kuboka sahib çıxsın və Konfrans yox, məhz Avropa Liqasına yollansın”.

O, aşağı liqa klublarının kubokda çoxluq təşkil etməsini müsbət hal kimi dəyərləndirib: “Bu il ölkə kuboku uğrunda rekord sayda klub mübarizə aparacaq. Əksər ölkələrdə bu praktika var. Elə yaxın Türkiyə, yaxud Rusiyanı götürək. Orada tez-tez aşağı liqa klublarının kubokda sayının çoxluq təşkil etdiyinə şahid oluruq. Peşəkar Futbol Liqasının bu qərarı təqdirəlayiqdir. Bu qərardan futbol qazanacaq”.

“Qəbələ”nin çalışdırıcısı cari mövsümdə də kuboku qazanmaq istədiklərini söyləyib: “Durumumuz qaydasındadır. Çempionatda istədiyimiz nəticələri qazana bilməsək də, oyun planında heç bir sıxıntımız yoxdur. Meydançada komanda istədiyim futbolu göstərməyə çalışır. Ümid edirəm ki, oyun keyfiyyətimizi yaxşıladırdıqca nəticələr də gələcək. Kubok sürprizlərlə doludur. Çempionatdan fərqli olaraq burada mərhələ 1 və ya 2 oyundan ibarətdir. Buna görə də fərdi yanaşmalar böyük rol oynayır. Çalışacağıq ki, kubokda mümkün qədər irəli gedəcək. Ötənilki nəticəmizi təkrarlamaq üçün əlimizdən gələni edəcəyik”.

E.Baxşıyev həftə sonu Premyer Liqanın XII turu çərçivəsində “Neftçi”yə qarşı keçirəcəkləri matçdan da söz açıb: “Tək “Neftçi”yə qarşı yox, bütün oyunlar çətin keçir. Maksimum köklənməyə çalışacağıq. Uğurlu nəticəyə inanırıq. Əlimizdən gələni edəcəyik ki, “Neftçi”yə qarşı öz oyunumuzu diktə edək. Məni daha çox düşündürən oyun keyfiyyətidir. Oyun keyfiyyəti mən istəyən səviyyədə olduqda nəticə də olacaq”.

Fərəc ASLANOV