"Simurq" "Bakı" ilə oyuna hazırdı

Premyer Liqanın XII turu çərçivəsində "Bakı"nın qonağı olacaq "Simurq", dünən qarşılaşmanın oynanılacağı meydançada məşqə çıxıb. Futbolxeber.az-ın məlumatına görə, bir saata yaxın davam edən hazırlıq prossesində bütün futbolçular iştirak edib. Uzun müddətdir zədə səbəbindən komandadan aralı qalan Rövşən Əmiraslanov da artıq heyətə qoşulub. Bugünkü görüşdə baş məşqçi Georgi Çixradze şans verəcəyi halda paytaxt təmsilçisilə görüşdə meydana çıxa biləcək. Yalnız İlkin Qırtımov cəzasının bitməməsi səbəbindən bu qarşılaşmada forma geyinə bilməyəcək. "Simurq"un bu günkü məşqində məşqçilər korpusu yetirmələrini elə də çox yormayıb. Yüngül qaçış və isinmə hərəkətlərindən sonra üç qrupa bölunən futbolçular, "kvadrat" oynayıb. Daha sonra ikitərəfli oyunla məşq davam edib. Hazırlığın sonunda isə qapıya zərbələr və küncdən asmaların qapanması üzərində çalışılıb.