Kamran İbrahimov: “Həm "Zirə"nin, həm də bizim oyunumuz alınmadı” (MÜSAHİBƏ)

“Kəpəz”in qapıçısı Kamran İbrahimov “Zirə” ilə oyundan (0:0) jurnalistlərin suallarını cavablandırıb. Futbolxeber.az saytının məlumatına görə, o, əvvəlcə qarşılaşma barədə fikirlərini açıqlayıb:

- Yaxşı mübarizə apardıq, vuruşduq, qələbə qazanmağa çalışdıq, amma qol vura bilmədik. İstənilən halda, qapımızdan top da buraxmadıq. Ən azından bir xal götürə bildik. "Zirə" oturuşmuş komandadır. İki ildir ki, Premyer Liqaya çıxmışıq. Vuruşduq, bir xalı qazana bildik.

- 10 tur ərzində “Kəpəz” yalnız iddialılardan xal alıb. Bunu nə ilə əlaqələndirmək olar?

- Bu, motivasiya ilə bağlı ola bilər. Hər oyunda qələbə qazanmağa çalışırıq. Olmayanda da, olmur. Futbol elədir ki, bəzən alınır, bəzən yox.

- Əvvəlcə "Kəpəz"də qapıçı problemi oldu, yeni transfer reallaşdı. Sanki bundan sonra daha inamlı oynamağa başladın...

- Özümə inamım artdı. Yeni komandaydıq, yeni yığışmışdıq. Ötən mövsüm bəlkə də özümü yaxşı tərəfdən göstərə bilmədim. Amma bu il məşqçilər sağ olsunlar, özümü göstərməyə şans verdilər. Bundan istifadə etdim və indi əsas qapıçıya çevrildim.

- Bir neçə gün əvvəl “Kəpəz” daha bir legioner qapıçı transfer etdi. Bu məqam səni narahat etmir?

- Xeyr, heç bir narahatçılıq yoxdur. Rəqabət artır. Biz bir-birimizi gücləndiririk. Bu da yaxşı haldır.

- Bu dəfə Gəncədə yox, Tovuzda oynadınız. Demək olar ki, Tovuz stadionu sizin üçün düşərli oldu?

- Bəli, olar. Amma ümumi götürəndə həm "Zirə"nin, həm də bizim oyunumuz alınmadı. Təbii örtüklü meydanda məşq edib, gəlib süni qazonda oynamaq bizim üçün çətindir. Azərbaycan çempionatında iki süni örtüklü meydançası olan komanda var, biri "Səbail", digəri "Turan Tovuz"un. Bu cür meydanda oynamaq hər komandaya əziyyət verir. Təbii örtükdə məşq edib, sonra süni meydançada oynamaq zədələrə yol açır, yorğunçuluq daha çox olur.

- Bunu daha çox meydan oyunçuları deyir. Qapıçılar üçün də eyni amil keçərlidir?

- Bəli, keçərlidir. Topun istiqaməti, sürəti, hər şeydə fərqlilik var.

- "Kəpəz"in turnir cədvəlindəki bugünkü durumu yaxşı deyil. Gələcəkdə necə olacaq? Komanda nə etməlidir ki, xallar qazansın?

- Hər oyunda mübarizə aparacağıq. Bilirəm ki, komandamızın xal baxımından vəziyyəti o qədər də yaxşı deyil. Sadəcə bundan sonrakı oyunlara baxmaq lazımdır. Çalışacağıq ki, uğurlu nəticələrimiz olsun.

- Qarşıdakı turda qərb derbisi olacaq. "Turan Tovuz"la matç haqda hansı fikirdəsən? "Zirə" ilə oyundan iki qat çətin olacağını fikri ilə razısan?

- Matç "Turan Tovuz"un öz meydançasında olacaq. Bizim üçün çətin keçəcək. Süni meydanda oynamağın özü də çətindir. Əslində, "Turan Tovuz" özü də təbii örtüklü meydanda məşq edir, daha sonra süni meydançada oynayır. Onlar da çətinlik çəkir. İki komanda üçün də asan keçməyəcək. Lakin bizim üçün ikiqat çətin alınacaq. Çünki "Turan Tovuz"un stadionunda oynayacağıq. Azarkeşlərimiz isə bizə hər zaman dəstək olurlar. Bir saatlıq yoldur, uzun məsafə deyil. Gəlirlər, dəstək olurlar, sağ olsunlar.

İbrahim CƏFƏROV, Tovuz