Yuri Matias: “4 qol vurmaq ayrı bir xoşbəxtlikdir” (MÜSAHİBƏ)

“Neftçi”nin müdafiəçisi Yuri Matiasın Futbolxeber.az saytına müsahibəsi

- İkinci dövrənin ilk turunda “Səbail” üzərində 4:2 hesablı qələbə qazandınız. Görüş barədə nə deyə bilərsiz?

- Qələbə qazandığımız üçün xoşbəxtik. 3 xal qazanmaq bizim üçün olduqca vacib idi. 4 qol vurmaq isə ayrı bir xoşbəxtlikdir. İlk dəqiqələrdə qapımızda qol görməyimiz mənfi məqam olsa da, növbəti oyunlarda daha diqqətli olmalı, bunu aradan qaldırmağa çalışmalıyıq.

- Vurduğunuz üçün qol demək olar ki, matçın taleyini həll etdi...

- Hər matçda fərqlənməyə çalışıram. Bu tərzdə qol vurmaq xoşuma gəlir. Artıq bu cür beş qol vurmuşam.

- Bu, həm də mövsüm ərzində üçüncü qolunuz oldu. Müdafiəçi olsanız da, ilk 10 turdan sonra “Neftçi”nin bombardirisiz.

- Bilirəm ki, işim qol vurmaq deyil. Mən mərkəz müdafiəçisiyəm. Bununla belə, bacardığımın ən yaxşısını etməyə çalışıram. Komandada bu cür oynamağa davam etmək istəyirəm.

- Mətbuatda adınız "Qarabağ"la yanaşı hallanır. Bu, nə dərəcədə realdır?

- Bu barədə məlumatlı deyiləm. Mətbuatda çox xəbərlər tez-tez tirajlanır. Lakin bu tərz xəbərləri oxumağı xoşlamıram. "Neftçi" üçün oynayıram, burada daha xoşbəxtəm. Mən hər mövsüm daha yüksək nəticə ortaya qoymaq istəyirəm, bu, mənim xarakterimdir.

- Yəni azarkeşlər “Neftçi”ni “Qarabağ”a dəyişməyəcəyinizə arxayın ola bilərlər?

- Mən ilk növbədə azarkeşlərimizə təşəkkürümü bildirirəm. Bu gün həqiqətən bizə möhtəşəm dəstək oldular.

- Sizdən öncə "Qarabağ" turun açılış oyununda xal itirdi. Bu məqam motivasiyanızı daha da artırdı?

- Oyundan öncə “Qarabağ”ın qələbə qazandığını eşitdik. Yalnız “Səbail”lə matç bitdikdən sonra bildik ki, "Qarabağ" son saniyələrdə qapısında qol görməklə xal itirib. Əsas işimiz öz oyunumuza baxmaqdır. Hər matçda daha da üst pillələrə qalxmaq üçün meydana çıxırıq.

- Vurduğunuz qolu kimə həsr etdiniz?

- Qolu mənim ən böyük azarkeşim olan həyat yoldaşıma həsr edirəm. Braziliyadan gəlib, mənim oyunumu seyr etmək üçün burdadır. İki həftə mənimlə birlikdə olacaq. Digər tərəfdən qolu bütün "Neftçi" azarkeşlərinə həsr edirəm. Onlar bu gün möhtəşəm idilər. Fanatlar mənə sosial şəbəkələrdə hər oyun daha çox dəstək olurlar. Xoş mesajlar göndərir, oyunumdan zövq aldıqlarını bildirirlər. Mən də onlardan aldığım bu enerjini meydanda göstərməyə çalışıram. Bundan məmnunam.

Azad NURİYEV