“Güclü rəqiblərlə oyunda "Qarabağ" bacardığından da yaxşısını etməyə çalışır”

“Qarabağ” hamımızın fəxr etdiyi klubdur. Həmişə olduğu kimi, bu mövsüm də Qurban Qurbanovun komandası ölkəmizi Avropa Liqasında layiqincə təmsil edir”.

Futbolxeber.az saytına müsahibəsində bu sözləri Məşqçilər Komitəsinin üzvü, təcrübəli mütəxəssis Yaşar Vahabzadə deyib.

O, Ağdam klubunun gələn həftə UEFA Avropa Liqasının qrup mərhələsində səfərdə “Bayer Leverkuzen”ə qarşı keçirəcəyi oyun barədə bunları söyləyib:

“Düşünürəm ki, bu oyunda da Ağdam təmsilçisi yaxşı oyun göstərəcək. Güclü rəqiblərlə oyunda "Qarabağ" bacardığından da yaxşısını etməyə çalışır. Konkret nəticə barədə nəsə demək çətindir. Amma əminəm ki, komanda əlindən gələni edəcək. “Bayer Leverkuzen” çox güclü rəqibdir. Hazırda Bundesliqa olmaqları elə hər şeyi deyir. Odur ki, təmsilçimizi qarşıda çox çətin matç gözləyir”.

Azad NURİYEV