“Sumqayıt”ın qapıçı problemi yoxdur” (MÜSAHİBƏ)

“Sumqayıt”ın qapıçısı Orxan Sadıqlının Futbolxeber.az saytına müsahibəsi

- Azərbaycan Premyer Liqasının son turunda “Kəpəz”ə qarşı keçirilən oyunda bu mövsüm ilk dəfə meydana çıxdız. Debütunuzu necə dəyərləndirirsiz?

- Sevindirici haldır ki, komandamda ilk oyunuma çıxdım. Öz çıxışımı dəyərləndirmək istəməzdim. Amma meydançada komanda yoldaşlarıma kömək edə bilmək mənim üçün xoşdur.

- Matçın gedişində oyun praktikasının yoxluğu ilə bağlı hər hansı bir çətinlik hiss edirdiz?

- Artıq 30 yaşım var. Yetəri qədər təcrübəyə sahibəm. Futbol elə oyundur ki, hər saniyə hər şey ola bilər. Çalışırdım ki, oyunu hiss edim və hər dəqiqə diqqətli olum. Öhdəsindən gəldiyim üçün şadam.

- Debütunuz qələbə ilə yekunlaşdı. Necə düşünürsüz, bu amil növbəti turda da start heyətində yer almağınıza təsir göstərəcək?

- Məşqlərimi ciddi edib, həmişə şansımı gözləyirəm. Şans gələndə də maksimum istifadə edib komandama kömək etməyə çalışıram. "Sabah"la səfər oyununa hazırlaşırıq, məşqçilər şans verdiyi halda canla-başla oynamağa hazıram.

- İlk 7 oyunda meydana çıxmadız. Bu müddətdə məşqçilərlə hər hansı bir söhbətiniz olmuşdumu?

- Komandaya gələndə asan olmayacağını bilirdim. Heyətdə Mehdi kimi güclü qapıçı var idi. Onunla yaxşı dostluğumuz var. Sağlam rəqabətdə də geri qalmayacaqdım. Ona görə də hər məşqə oyuna çıxacağım kimi hazırlaşıram. Məşqçilərimizlə söhbətimiz həmişə olub, yenə olacaq. Bu söhbətlərin məğzi məndə qalsa yaxşıdır (gülür). "Sumqayıt"ın qapıçı problemi yoxdur. Mehdi ilə mən hər bir oyuna hazırıq.

- Azərbaycan Premyer Liqasında ilk dövrəni “Sumqayıt” üçün necə dəyərləndirmək olar?

- Yeni yaranmış komandayıq. Artıq “qabığımızı dəyişmişik”. Səbrli olmaq lazımdır. Yavaş-yavaş komanda lazımi formaya gəlib çatacaq. Belə bir komanda üçün ilk dövrəni yaxşı dəyərləndirmək olar. Həm də unutmaq olmaz ki, rəqiblərimizdən bir oyun az keçirmişik.

- Ardıcıl 2 qələbə ilə mövsümə start verdiz. Sonrakı 5 oyunda isə komanda 3 xal qazana bilmədi. Uğurlu startın davamını gətirməyə nə mane oldu?

- Komanda yenidir, çoxlu yeni futbolçular var. Adaptasiya olmaq üçün vaxt lazımdır. Hər şey öz qaydasına düşdükcə uğurlar gələcək.

- Artıq bütün rəqibləri iş başında görmüsüz. “Sumqayıt” bu mövsüm hansı nəticəyə ümid edə bilər?

- Çempionatın əvvəlindən komandamızın hədəfləri bəllidir. 4-cü, 5-ci yerlər uğrunda mübarizə aparırıq. Digər bir hədəfimiz isə Azərbaycan kubokunun fınalına vəsiqə qazanmaqdır.

Azad NURİYEV