Şahin Diniyev: “Coşqun kritik məqamda hesabı açdı”

“Coşqunun oyununu izlədim. Çox yaxşı çıxış etdi”.

Futbolxeber.az saytına müsahibəsində bu sözləri “Səbail”in baş məşqçisi Şahin Diniyev oğlu Coşqun Diniyevin dünən “Ümraniyespor”un heyətində qol hesabını açmasına münasibət bildirərkən deyib.

O, Coşqunun oyunundan razılığını ifadə edib: “Coşqun kritik məqamda hesabı açdı. Komandası zəif çıxış edirdi, fərqlənə bilmirdi. Nəhayət Coşqun uzaqdan gözəl zərbə ilə hesabı açdı. Onun çıxışından çox razıyam. Komandanın oyununu apara bilir”.

Təcrübəli mütəxəssis Coşqunun əvəzlənməsini milli komandanı düşünməsi ilə əlaqələndirib: “Coşqun 77-ci dəqiqədə kiçik zədə aldı. Milli komandanın qarşıdakı matçlarını nəzərə alaraq oyuna davam etməməyə qərar verdi. Matçdan dərhal sonra özündən zədəsinin ciddi olub-olmadığı barədə soruşdum. Mənə milli komandanı düşündüyünü bildirdi. Bu, olduqca yaxşı haldır”.

Azad NURİYEV