Vüqar Mustafayev: “Keçənilki kimi “dib”i görmək istəmirik”

“Oyun haqqında danışılası çox şey yoxdur. İstəyirdik ki, “Qarabağ”dan ən azı 1 xal alaq. Düzdür, rəqibin gücü məlumdur. “Qarabağ” çempionluğa ən real namizəddir. Öz oyunumuzu sərgiləsəydik, xal almaq mümkün idi”.

Futbolxeber.az saytına müsahibəsində bu sözləri “Sumqayıt”ın kapitanı Vüqar Mustafayev Azərbaycan Premyer Liqasının VIII turunda “Qarabağ”a 0:5 hesabı ilə uduzduqları oyunu şərh edərkən deyib.

O qeyd edib ki, “Sumqayıt”dan fərqli olaraq rəqibdə hər şey alınıb: “İstədiklərimizi meydanda göstərə bilmədik. Oyunumuz heç cür alınmadı. Rəqibdə isə əksinə, demək olar ki, hər şey alındı”.

Mustafayev erkən qolların həlledici olduğunu söyləyib: “İlk iki topu çox erkən buraxdıq. Bundan sonra komanda olaraq düşüş yaşadıq. Rəqib də bundan yararlandı. Real yanaşsaq, “Qarabağ” kimi komandaya qarşı oyunda 0:4-dən sonra geridönüş etmək çox çətindi”.  

Kapitan bildirib ki, ikinci yarıda heç olmasa təsəlli qolu vurmağa çalıblar: “Çalışdıq ki, fasilədən sonra heç olmasa fərqlənək. Hücumlar etmək üçün səy göstərirdik. Lakin təəssüf ki, son nöqtəni gətirə bilmədik. Bəlkə də birinci hissədə qol vursaydıq, vəziyyət bir qədər fərqli olardı. Amma bu, bəlkədi...”

Mustafayev bildirib ki, neçə top fərqli ilə uduzmaq ciddi əhəmiyyət kəsb etmir: “Əlbəttə, heç kim istəməz ki, bu cür hesabla uduzsun. Amma istənilən halda uduzmuşuq. Fərqi yoxdur, 1, ya 5 qol fərqi ilə. Hər iki halda xalsız qalırsan”.

Təcrübəli futbolçu artıq növbəti matçı düşündüklərini vurğulayıb: “Artıq bu matçı unudub, vəziyyətdən çıxmalıyıq. Bu da öz əlimizdədi. Qarşıda bizi “Kəpəz”lə qarşılaşma gözləyir. Həmin oyunda bütün gücümüzü meydanda qoyub azarkeşlərimizi sevindirməliyik. Uğursuz seriyaya mütləq növbəti turda son qoymalıyıq. Özü də çoxdandır ev oyununda qələbə qazanmırıq”.

Vüqar Mustafayev ötənilki hissləri yaşamaq istəmədiklərini söyləyib: “Keçən il də bu hissləri yaşamışdıq. “Dib”i gördük. İndi keçənilki kimi “dib”i görmək istəmirik. Sadəcə bir qələbə lazımdı ki, inam qayıtsın. Ümid edirəm ki, qarşıdakı matçlarda eyni səhvləri təkrarlamayacağıq. Komandanın potensialı var. “Sumqayıt” daha yaxşısına qadirdi”.

“Belə görünür ki, “Kəpəz”dən başqa bütün klublar avrokuboklara iddialıdı. Bu siyahıya “Sumqayıt”ı da əlavə etmək olar?” sualını kapitan belə cavablandırıb: “Kəpəz”dən də soruşsaz, onlar da bunu istər. Kim istəməz ki, medal qazansın, avrokuboklarda çıxış etsin? Bəli, biz də istəyirik. Sona kimi də vuruşacağıq. Yekunda nə olacağını isə zaman göstərəcək”.

Azad NURİYEV