Maksim Medvedev: “Mölde”nin “Qalatasaray”la oyununa 5 dəfə baxmışdım”

“Bizim üçün ağır oyun idi. Rəqibi çox yaxşı analiz etmişdik. Bilirdik ki, sürəfli, texnikalı futbolçuları var. Necə oynamalı olduğumuzu baş məşqçimiz bizə tam izah etmişdi. Biz də çalışdıq ki, meydanda verilən tapşırıqları düzgün yerinə yetirək”.

Futbolxeber.az saytına müsahibəsində bu sözləri “Qarabağ”ın kapitanı Maksim Medvedev UEFA Avropa Liqasının ilk turunda “Mölde”ni 1:0 hesabı ilə məğlub etdikləri oyundan sonra jurnalistlərə müsahibəsində deyib.

O qeyd edib ki, Norveç çempionu ilə matçda qolm şanslarını qaçırmaları bir qədər işlərini çətinləşdirib: “Qol imkanlarımız çox oldu. Təbii ki, istərdik ki, hamısından yararlanaq. Təəssüf ki, bəzən istədiklərin tam alınmır. Yaxaladığımız epizodlardan 2-3-nü dəyərləndirsəydik, daha rahat olardıq. Belədə rəqib də erkən təslim olacaqdı. Yenə də şükürlər olsun ki, lazımi qolu vurduq. Sonradan da oyuna nəzarət bizim tərəfimizdə idi. Qalib gəldiyimiz üçün hər kəs sevinir. Bundan sonra daha da irəli getməliyik”.

Medvedev müdafiədə heç də ideal çıxış etmədiklərini söyləyib: “Əslində, müdafiədə mükəmməl deyildik. Müəyyən boşluqlar var idi. Bu da olmalıdı. Çünki yerli çempionatın yox, Avroliqanın qrup mərhələsinin matçı idi. Hər mövqedə boşluqlara yol verdik. Əsas odur ki, lazımi nəticəni qazandıq. Təbii ki, səhvlərimizi yenə də analiz edəcəyik. Baş məşqçi çatışmayan cəhətlərimizi göstərəcək. Gələn oyunlarda daha yaxşı çıxış etməliyik”.

Təcrübəli müdafiəçi “Mölde”nin “Qalatasaray”a qarşı oyunlarını diqqətlə izlədiklərini qeyd edib: “Mölde”nin “Qalatasaray”la hər iki oyununu izləmişəm. Bəlkə 5 dəfə baxmışam. Baş məşqçimiz də həmin görüşləri izlədikdən sonra bizə bir qədər fərqli tapşırıqlar verdi. Məhz həmin tapşırıqlardan istifadə edərək qapımızı toxunulmaz saxladıq. Lakin qol buraxmamağımızı tək müdafiə xəttinin adına yazmaq olmaz. Hücumçular da müdafiəyə çox kömək edirdilər. Sağ olsunlar, onlar meydanda çox işlədilər və bizim yükümüzü bir qədər asanlaşdırdılar”.

Qrupdakı şanslarını dəyərləndirən Maksim Medvedev vurğulayıb ki, favorit göstərilən “Bayer Leverkuzen”lə oyunları daha rahat olacaq: “Bizim üçün bu qrupda ən çətini “Mölde” və “Hekken”lə oyunlardı. Çünki bu matçlarda hamı bizdən qələbə gözləyir. “Bayer Leverkuzen” isə qrupun aşkar favoritidi. Bu səbəbdən də onlara qarşı daha rahat oynayacağıq”.

Fərəc ASLANOV