İvan Brkiç “Beşiktaş”a məğlubiyyəti şərh edir: “İkinci hissədə yorulduq”

“Neftçi”nin qapıçısı İvan Brkiç “Beşiktaş”la oyundan sonra Futbolxeber.az saytına müsahibə verib.   

- 1:2 hesablı məğlubiyyəti necə şərh edərdiz?

- Oyun bizim üçün yorğun keçdi (gülür). İlk görüşdən sonra iki top fərqi ilə geridə idik. İstanbulda da bizi çətin qarşlaşmanın gözləyəcəyindən xəbərdar idik. İlk 45 dəqiqəni çox yaxşı oynadıq. İkinci hissədə daha çox hücum edib, növbəti qolları vuracağımıza ümid edirdik. Rəqibin gücünü də qeyd etmək lazımdı. “Beşiktaş”ın oyunçuları təcrübəlidirlər. Komandamız ikinci hissədə artıq yorulmuşdu. Düşünürəm ki, bu hal bizim üçün əsas problem oldu. Biz özümüzə gələ bilmədik. Onlar çox güclü azarkeş dəstəyi altında oynayırdılar. İkinci hissədə "Beşiktaş" daha güclü oyunçuları meydana atdı. Biz onlara qarşı oyunda 100 faizlik performansı ortaya qoymalı idik. Belə hallara hazır olmaq, soyuq başla düşünmək lazımdır. Düşünürəm ki, ümumilikdə yaxşı oyun keçirdik. Artıq bu səhifəni bağlamalı, Azərbaycan çempionatındakı oyunlar və qələbələr barədə düşünməyə başlamalıyıq.

- Bu cür atmosferdə oynamaq “Neftçi” üçün nə dərəcədə çətin idi?

- Heyətdə hər kəs bu cür atmosferdə, belə komandalara qarşı oyunlar keçirməyi xəyal edir. Belə atmosferdə oynamaqdan həzz alırıq. Bakıdakı azarkeşlərimiz də "Beşiktaş" azarkeşlərindən möhtəşəm atmosfer yaratmaq baxımından geri qalmırdı. Türkiyəyə bu oyun üçün gələn bütün azarkeşlərimizə öz təşəkkürümü bildirirəm.

- “Beşiktaş”ın səviyyəsi, keyfiyyəti hər kəsə məlumdur. Razısız ki, başqa bir rəqiblə oynasaydınız, mərhələ adlamaq şansınız daha çox olardı?

- Hər komandaya qarşı fərqli oynamağa məcbursan. Biz bu barədə düşünmürdük. Rusiyada olarkən "Fənərbaxça"ya qarşı da oynamışdıq. Minimal hesabla məğlub olmuşduq. Hər oyun insanın yaddaşında fərqli cür qalır. Biz qalib gələ və ya uduza bilərik.

- Qeyd etdiyiniz kimi, artıq diqqəti ölkə çempionatına yönəldəcəksiniz. Həftə sonu "Sabah"a qarşı matçdan gözləntiləriniz nədir?

- “Sabah”la oyuna hazırlaşmaq üçün çox qısa zamanımız var. Komanda olaraq Azərbaycan çempionatında artıq qələbələr qazanmağa başlamalıyıq. Son 2 turda bir heç-heçəmiz və bir məğlubiyyətimiz var.

Azad NURİYEV, İstanbul