“Qarabağ” ardıcıl 10-cu dəfə avrokubokların qrupunda!

“Qarabağ” tarixində ardıcıl 10-cu dəfə avrokubokların qrup mərhələsində çıxış edəcək.

Futbolxeber.az saytının məlumatına görə, UEFA Avropa Liqasının III təsnifat mərhələsinin cavab görüşündə HİK-i Bakıda olduğu kimi yenə də 2:1 hesabı ilə üstələyən Ağdam klubu pley-off mərhələsinə yüksəlib. Bununla da Qurban Qurbanovun komandası ardıcıl 10-cu dəfə avrokubokların qrup mərhələsində iştirakı təmin edib. Belə ki, pley-off mərhələsində Sloveniya “Olimpiya”sı ilə üz-üzə gələcək “Qarabağ” 2 görüşün nəticəsinə əsasən üstün ola bilsə, Avropa Liqasının qrup mərhələsinə, əks halda isə Konfrans Liqasının qrup mərhələsinə vəsiqə əldə edəcək. HİK-i mübarizədən kənarlaşdırmaqla Qurban Qurbanovun komandası minimum Konfrans Liqasının qrup mərhələsini təmin edib.

Xatırladaq ki, 2014/15 mövsümündən başlayaraq ardıcıl 10-cu dəfə qrupda mübarizə aparacaq “Qarabağ”  bir dəfə (2017/18) Çempionlar Liqasının, yeddi dəfə (2014/15, 2015/16, 2016/17, 2018/19, 2019/20, 2020/21, 2022/23) Avropa Liqasının, bir dəfə Konfrans Liqasının (2021/22) qrupunda oynayıb.