"Qarabağ" belə çətinliklərə öyrəşib, amma sonda mərhələ adlayıb”

Milli komandamızın məşqçisi Arif Əsədov "Qarabağ"ın UEFA Çempionlar Liqasının təsnifat mərhələlərindəki çıxışları barədə Futbolxeber.az saytının suallarını cavablandırıb.

- “Qarabağ” bu gün UEFA Çempionlar Liqasının ikinci təsnifat mərhələsində cavab oyununa çıxır. “Rakuv”la matç barədə fikirləriniz? Komandamızın turu keçmək şansları nə qədərdir?

- İlk olaraq "Qarabağ"a və bütün klublarımıza uğurlar arzulayıram. "Qarabağ"ın şanslarını yüksək qiymətləndirirəm. Baxmayaraq ki, komandamız Polşada məğlub olub. Hesab edirəm ki, bu, yalnız hesab baxımından məğlubiyyətdir. Oyun baxımdan "Qarabağ" ilk matçda rəqibdən daha yaxşı görünürdü. Vurulan qollara da baxsaq, komanda şəklində qurulan hücumun nəticəsidir. Bu da onu göstərir ki, "Qarabağ" komanda oyunu baxımından "Rakuv"dan daha yaxşıdır. Rəqib güclüdür, nizam-intizamlıdır, amma "Qarabağ"ın dişinə görədir. "Qarabağ" belə çətinliklərə öyrəşib, amma sonda yenə də mərhələ adlayan tərəf olub.

- “Qarabağ” turu keçərsə, növbəti mərhələdə Kiprin "Aris" klubu ilə qarşılaşacaq. Fikrinizcə, Kipr klubu "Qarabağ" üçün uyğun rəqibdir?

- Biz ilk olaraq bugünkü oyun barədə düşünməliyik. Məncə, Polşa çempionu Kipr çempionundan daha üstündür. "Qarabağ" özü də "Aris"dən qat-qat üstün komandadır. Baxmayaraq ki, Kipr klubu BATE-yə 2 oyunda 11 qol vurub. Onu da qeyd edək ki, BATE Belarus üçüncüsüdür, çempionu deyil. Yenə də "Qarabağ" "Aris" komandasına qarşı da şanslarını yüksək qiymətləndirirəm.

- Yeri gəlmişkən, Ağdam klubu mərhələ adlaya bilməsə, Avropa Liqasında "Molde" - "HİK" cütünün məğlubu ilə qarşılaşacaq. Bu rəqiblər komandamıza nə dərəcədə sərf edir?

- Məğlubiyyət barədə düşünmək istəməzdik. Amma şər deməsək, xeyir olmaz. Amma bu klublardan hansının düşməsinin fərqi yoxdur. "Qarabağ" bundan da güclü rəqiblərlə qarşılaşıb. Bu baxımdan həm "Molde", həm də HİK "Qarabağ"ın dişinə görədir.

- "Qarabağ"ın hazırkı heyəti nə dərəcədə güclüdür? Komanda Çempionlar Liqasında hansı mərhələyə qədər irəliləməyə qadirdir?

- "Qarabağ"da bu dönəmlərdə oyun baxımından çətinliklər olur. Çünki komandadan gedənlər olur, əvəzində yeni oyunçular transfer olur. Ona görə çətinliklər olur. Düşünürəm ki, "Qarabağ" qarşıdakı oyunlarda daha güclü performans nümayiş etdirəcək. Hücumçu mövqeyinə mütləq yeni transfer lazımdır. Hazırda həmin mövqedə Cica oynasa da, bilirik ki, o da sırf hücumçu deyil. Bu baxımdan hücumçuya ehtiyac var. Yeni transfer Juninyonun hələ ki performansını görməmişik. Bu oyunlarda ondan istifadə etmək yaxşı olar. Qruplara düşmək üçün isə hücumçuya ehtiyac olacaq.

- Ağdam təmsilçisinin qapıçı seçimi ilə bağlı nə deyə bilərsiniz? Səhvlərə baxmayaraq, baş məşqçi Qurban Qurbanov Şahruddinə inanır. Ehtiyatda isə Luka Quqeşaşvili və gənc Amin Ramazanov var. Bu qapıçıları necə müqayisə edərdiniz?

- Qapıçı ilə bağlı həmişə fikrimi bildirmişəm ki, bu mövqedə səhv qaçınılmazdır. Qapıçının səhvi isə sığortalanmadığı üçün gözə tez görünür. Məncə, Şahruddin yenə də bir nömrəli qapıçıdır. Həm millidə, həm də "Qarabağ" da ona ehtiyac var. Ona görə qarşıdakı oyunlarda Şahruddinin çox köməyi dəyəcək. Komandaya qapıçı gətirməklə Şahruddinə psixoloji baxımdan təsir etmiş olarıq.

Azad NURİYEV