Mahir Emreli: “Hamı 3 xal üçün bütün gücünü ortaya qoydu”

“Yaxşı oyun keçirdik. İstradakı bütün matçlar kimi, budəfəki qarşılaşmanın da ağır keçəcəyini gözləyirdik. Belə də oldu”.

Futbolxeber.az saytının Xorvatiya mətbuatına istinadən verdiyi məlumata görə, bu sözləri “Dinamo” Zaqrebin hücumçusu Mahir Emreli “İstra 1961”lə dünənki oyun haqda danışarkən deyib.

Emrelinin komandası Xorvatiya liqasının 2-ci turunda 3:0 hesabı ilə qələbə qazanıb. Azərbaycan millisinin futbolçusu Mahir Emreli bu oyunda 1 qol vurub və 1 qolun ötürməsini edib. Bu, onun yeni mövsümdə ilk qolu olub.

Xorvatiyanın index.hr nəşri Bruno Petkoviç və Yosip Drmiçin ehtiyatda qalmasını, Mahirin isə əsas heyətdə oynamasını çoxlarını təəccübləndirdiyini yazıb. Bununla belə, onlar Mahiri bu görüşün qəhrəmanlarından biri adlandırıblar. “Baş məşqçi İqor Bişçan Emrelinin nəticəyə ciddi töhvə verdiyi dedi” - sayt yazıb.

M.Emreli özü isə deyib ki, onlar üç xal qazanıblar: “Hamı, o cümlədən yeni oyunçular 3 xal üçün bütün güclərini ortaya qoydular”.

Azərbaycanlı futbolçu komanda yoldaşı Luka İvanuşetslə matçdan öncəsi söhbəti barədə də danışıb. Xorvat oyunçu dünən Mahirin ötürməsindən sonra 1 qol vurub, eləcə də həmyerlimizə qolun ötürməsini verib.

“Matçdan əvvəl İvanuşetslə razılaşdıq ki, oyunumuzla bir-birimizi tamamlayaq. Məşqçimizin tələblərini yerinə yetirməyə çalışıram. İndi bizi Astanaya uzun səfər gözləyir (Çempionlar Liqası oyununa - red.). Biz yaxşı hazırlaşmalı, qələbə qazanmalı və rahatlaşmamalıyıq” - deyə M.Emreli bildirib.