Azər Bağırov: “Mövsümə 60-70 faiz hazırıq”

Yeni mövsümün hazırlığını davam etdirən “Araz-Naxçıvan” Qəbələ toplanışını başa vurub.

Futbolxeber.az saytının məlumatına görə, komandanın baş məşqçisi Azər Bağırov klubun mətbuat xidmətinə açıqlamasında toplanışı belə dəyərləndirib:

“Qəbələ toplanışı məşqçilər üçün bəzi məqamlara aydınlıq gətirmək baxımından faydalıydı. Yeni dəvət etdiyimiz legionerlərin fiziki, taktiki və mental olaraq uyğunlaşması baxımından diqqətçəkən amillər oldu. Komplektləşmə baxımından işlər davam edir, komandaya qarşıdakı günlərdə yeni futbolçular qoşulacaq. İşimiz çoxdur və çətindir. Mövsümün startına çox az vaxt qalıb. Oyunlar zamanı istifadə edəcəyimiz taktiki gedişlərin futbolçular tərəfindən mənimsənilməsi lazımdır. Düzdür, ilk 1-2 həftə çətin olacaq, amma tədricən öhdəsindən gələcəyik”.

O, mövsümə 60-70 faiz hazır olduqlarını bildirib: “Qəbələ toplanışını ikitərəfli oyunla yekunlaşdırdıq. Futbolçular onlardan nə istədiyimizi meydanda praktiki olaraq göstərməyə çalışdılar. Bəzi məqamlarda istəyimizə çatdıq, elə epizodlar oldu ki, narazı qaldıq. Xətlərarası əlaqədə çatışmazlıqlar var, ona görə də qarşıdakı günlərdə bunun üzərində işləyəcəyik. Mövsümə 60-70 faiz hazırıq. Buraxılmış günləri mütləq kompensasiya etməliyik. Bir sözlə, işimiz çoxdur”.