"Klub işıqlandırma sistemini çempionatın startına qədər təhvil verməyə çalışır" - PFL-dən açıqlama

“Araz Nazçıvan” rəsmiləri ilə daim əlaqədəyik. Hələlik komandanın stadion məsələsi ilə bağlı nəsə demək olmur. Çünki onlardan stadionla bağlı təsdiq məktubu almamışıq. Yalnız həmin məktubu aldıqdan sonra bu barədə ətraflı məlumat verə bilərik”.

Futbolxeber.az saytına açıqlamasında bu sözləri Peşəkar Futbol Liqasının texniki-idman direktoru Elgiz Abbasov yeni mövsümdən Premyer Liqada çıxış edəcək "Araz Naxçıvan"ın ev oyunlarını hansı stadionda keçirəcəyi barədə sualı cavablandırarkən deyib.

E.Abbasov Tovuz şəhər stadionunda görülən işlərə də toxunub. O, işıqlandırma sistemi qurulduqdan sonra "Turan Tovuz"un ev oyunlarının yeni mövsümdən nisbətən gec saatda başlamasının mümkünlüyündən də söz açıb: "Sevindirici haldır ki, Tovuz şəhər stadionunda yenidənqurma və təmir işləri davam edir. Klubla daim əlaqədəyik. Düzdür, işlər tam sürətlə davam edir. Lakin indidən oyunların gec saatda başlaması haqda nəsə demək çətidi. Bu günə olan məlumat odur ki, klub çempionatın startına qədər işıqlandırma sistemini tam şəkildə təhvil verməyə çalışır”.