“O, “Linkoln”la matçda özünü yaxşı tərəfdən göstərməyi bacardı” - AÇIQLAMA

“Nəriman Axundzadənin Çempionlar Liqasının oyununda start heyətində yer alması çox müsbət haldı. Qurban Qurbanovun gənclərə mərhələ-mərhələ şans verərək, onları komandaya qazandırmasına adət etmişik”.

Futbolxeber.az saytına açıqlamasında bu sözləri milli komandamızın məşqçisi Arif Əsədov deyib.

Çempionlar Liqasının I mərhələsinin ilk oyunu çərçivəsində "Qarabağ"ın səfərdə "Linkoln"u 2:1 hesabı ilə məğlub etdiyi matçda baş məşqçi Qurban Qurbanov gənc Nəriman Axundzadəyə start heyətində şans verib. Arif Əsədov 61 dəqiqə meydanda olan 19 yaşlı futbolçunun özünü yaxşı tərəfdən göstərdiyini qeyd edib:

“Nərimanın oyunu yaxşı alındı. Özünü yaxşı tərəfdən göstərməyi bacardı. Beynəlxalq təcrübəsinin azlığına baxmayaraq, meydanda inamlı görünürdü, rəqibdən çəkinmirdi. Hətta Axundzadə bəzi epizodlarda oyunu üzərinə də götürürdü. Təbii ki, bu cür matçlarda çıxış etdikcə futbolçunu keyfiyyəti artır. İnanıram ki, tezliklə Nəriman daha çox inkişaf edəcək, həm “Qarabağ”a, həm də ümumilikdə futbolumuza faydası dəyəcək”.