Rahid Əmirquliyev futbolçu karyerasını başa vurdu

Son illər “Səbail”də çıxış edən Azərbaycan futbolunun ən istedadlı nümayəndələrindən biri olan Rahid Əmirquliyev futbolçu karyerasını bitirmək qərarına gəlib.

Futbolxeber.az saytının məlumatına görə, bu barədə paytaxt klubunun feysbuk səhifəsinə açıqlama yayıb:

“Əsl peşəkar, böyük kapitan və gözəl insan - klubumuz və ümumilikdə, futbolumuz üçün etdiklərin unudulmayacaq!

Azərbaycan Premyer Liqasının və “Səbail” FK-nın heyətində ən çox oyun keçirən futbolçu kimi klubumuzun tarixində önəmli bir səhifə olaraq qalacaqsan”.

Bildirilib ki, Rahid Əmirquliyevin karyerasını “Səbail”də digər ampluada davam etdirməsi ilə bağlı hazırda danışıqlar aparılır.

Qeyd edək ki, Rahid Əmirquliyev Azərbaycan Premyer Liqasında 457 oyunda meydana çıxıb. O, daha çox “Xəzər Lənkəran”dakı çıxışları ilə tanınıb.