Millimiz onun yolunun gözləyir...

İyunun 17-də Avro-2024-ün seçmə mərhələsində Estoniya ilə üz-üzə gələcək Azərbaycan milli komandası hələ ki qarşıdakı matça tam heyətlə hazırlaşa bilmir.

Futbolxeber.az saytına müsahibəsində bu barədə milli komandamızın məşqçisi Arif Əsədov məlumat verib.

O bildirib ki, hazırda yığma 1 nəfərin yolunu gözləyir:

“Məşqlərə ayın 6-dan start vermişik. Komanda hazırlığa tam heyətlə başlamayıb. Baş məşqçi Canni de Byazi ölkə kubokunun finalında çıxış edən futbolçulara əlavə istirahət vermişdi. Artıq Mahir Emreli də millinin düşərgəsinə qoşulub. Hazırda yalnız 1 nəfərin yolunu gözləyirik. Bu da Anton Krivotsyukdur. Cənubi Koreya çempionatında bu gün 18-ci turun oyunları keçiriləcək. Yalnız bugünkü matçdan sonra Anton “Daejeon”un düşərgəsini tərk edəcək. O, iyunun 12-dən milliyə qoşulacaq”.

Qeyd edək ki, iyunun 17-də “Dalğa Arena”da keçiriləcək Azərbaycan - Estoniya matçı 20:00-da start götürəcək.