Rəşad Sadıqov: “Onların açıqlamaları bizi qıcıqlandırdı”

Sabah DÇ-2014-ün seçmə mərhələsi çərçivəsində Rusiyaya qarşı keçiriləcək oyundan öncə təşkil olunan mətbuat konfransında milli komandamızın kapitanı Rəşad Sadıqov da iştirak edib. Futbolxeber.az-ın məlumatına görə, təcrübəli müdafiəçi güclü rəquib üzərində qələbə qazanmaq istədiklərini qeyd edib: “Bizi vacib oyun gözləyir. Seçmə mərhələni də qələbə ilə başa vurmaq istəyirik. Mükafat haqqında yalnız oyundan sonra danışırıq. Matçdan əvvəl bütün diqqətimizi qarşılaşmaya kökləmişik. Mahir Şükürovla Kamran Ağayevin mətbuata açıqlama verməməklərinin səbəbini bilmirəm. Gələn dəfə onlarla bu haqda danışaram. Rusiyalı futbolçuların oyundan öncə verdiyi açıqlamalar bizi qıcıqlandırdı. Onlar peşəkar futbolçulara yaraşmayan açıqlamalar verir. Məğlub ola bilərik. Amma belə açıqlamalar vermək olmaz. Təəssüf ki, Aleksandr Səmədovla meydanda üz-üzə gələcəyik. Onu Səmədov kimi adlandırmaq istəməzdim. O mənim üçün sadəcə Aleksandrdı. Əgər kimsə öz gücünə inanırsa, bunu meydanda göstərməlidir”.