Ruslan Abışov: “Səmədov bizim fəxrimizdi”

Millimizin və “Rubin”in üzvü Ruslan Abışov Rusiya mətbuatına açıqlama verib. Futbolxeber.az-ın məlumatına görə, Abışov qarşıdakı Azərbaycan - Rusiya matçı, eləcə də rəqibin heyətində çıxış edən həmyerlimiz Aleksandr Səmədov haqda danışıb: “Deməzdim ki, Rusiya ilə oyun bizim üçün həddindən artıq prinsipial olacaq. Rəqib komandaya həmişə hörmətlə yanaşmışıq. Azərbaycanın bir çox futbolçusu beynəlxalq turnirlərdə həmişə Rusiyaya azarkeşlik edib. Sadəcə biz istəyirik ki, seçmə mərhələni qələbə ilə başa vuraq və azarkeşlərimizi sevindirək. Şimali İrlandiyaya qalib gəldimiz üçün komandamızda yaxşı ab-hava var. Oyuna yaxşı köklənmişik. Səmədov bizim fəxrimizdir. O, çox istedadlı futbolçudur. Rusiya millisində oynamağı üstün tutsa da, seçiminə hörmətlə yanaşıram. Necə ki, türklər Məsut Özilə görə Almaniya millisinə azarkeşlik edir, biz də Səmədova görə Rusiya yığmasına azarkeşlik edəcəyik".