Elhad Nəziri: "İnter"in futbolçusuyam, o klub haqda danışmağa dəyməz" (Müsahibə)

"İnter"in və milli komandamızın müdafiəçisi Elhad Nəziri Futbolxeber.az saytına müsahibə verib.

- Artıq bir neçə gündür ki "İnter" Gürcüstanda təlim-məşq toplanışındadır. Hazırlıqlar necə keçir?

- Hər şey yaxşıdı. Bütün komanda olaraq qarşıdakı oyunlara hazırlaşırıq.

- Uğursuz oyunlardan sonra "İnter" dövrəni 2 ardıcıl qələbə ilə başa vurdu. Komanda artıq özünə gəlib?

- Bu qələbələr bizə çox lazım idi. İnşallah, qarşıdakı oyunlara ciddi şəkildə hazırlaşırıq. Çalışacağıq ki, növbəti oyunlarda da maksimum nəticə göstərək.

- Səncə, fasilə komandaya nə dərəcədə faydalı olacaq?

- Bunun bizə faydası dəyəcək. Bütün komandamız səylə hazırlaşır. Yəqin ki əziyyətimiz hədər getməz.

- "İnter"ə gəlişindən bir müddət keçsə də, hələ əsas heyətin daimi üzvünə çevrilə bilməmisən. Buna nə mane olur?

- Komandaya tam uyğunlaşmışam. Sadəcə, son 2 həftədə zədəli idi. Komanda ilə məşqlərə yenicə başlamışam. İnanıram ki, tezliklə əsas heyətin futbolçusu olacağam. Tez bir zamanda komandama fayda vermək üçün əlimdən gələni edəcəyəm.

- Xatırlayırsansa, "Rəvan"dan ayrıldıqdan sona Futbolxeber.az-a verdiyin açıqlamada demişdin ki, "gedişim barədə indi ətraflı danışmaq istəmirəm. Müəyyən vaxtdan sonra danışarıq". İndi açıqlaya bilərsən, həmin vaxt "Rəvan"la aranda nə baş vermişdi?

- Artıq "İnter"in futbolçusuyam. Başqa klub haqda danışmq istəmirəm. Həmin vaxt "Rəvan"da olan bütün futbolçular da mənim haqlı olduğumu bilirlər. Ona görə də danışmağa dəyməz.