"Premyer Liqada 12 komandanın olması daha yaxşıdır"

"Çox çətin qələbə qazandıq. Çünki "Turan Tovuz" yaxşı futbol sərgiləyir. Fərqi yoxdur əsas heyətlə oynayırlar və ya ikinci heyətlə. İkili mübarizələrdə, uzun toplarda, standart vəziyyətlərdə çox yaxşı oynayırlar. Bizim üçün çox önəmli olan 3 xalı əldə etdik".

Futbolxeber.az saytının məlumatına görə, bu sözləri "Sabah"ın baş məşqçisi Murad Musayev Azərbaycan Premyer Liqasının 31-ci turunda bu gün səfərdə "Turan Tovuz"a qalib gəldikləri (2:0) matçdan sonra mətbuat konfransında deyib.

Rusiyalı mütəxəssis çempionluq mübarizələri haqda suala qısa cavab verib: "Mən təkcə "Şamaxı" ilə matç barədə düşünürəm. Məqsədim komandamı bu oyuna hazırlamaqdır. Hansı mövqedə olacağımızı mayın 28-də görəcəyik".

Musayev oyundan dərhal sonra futbolçularını məşqə çıxarmasının səbəbini də açıqlayıb: "Bir çox komandalarda az yükləmə alan futbolçuların oyundan sonra məşq etməsi adi haldır".

Baş məşqçi Abdullaye Banın heyətdə olmamasını belə izah edib: "Xatırlayırsızsa, Musa Qurbanlı onun zədəli ayağına zərbə endirdi. Oyunu çox çətinliklə bitirə bildi. Hazırda Ba müalicəsini davam etdirir".

M.Musayev "Premyer Liqanı hansısa komanda tərk etməlidir, yoxsa əlavə iki komanda gəlsə, yaxşı olar" sualını da cavablandırıb: "Mənim üçün 12 komandanın olması əlbəttə ki, yaxşıdır. Amma gələcək komandaların Premyer Liqanın səviyyəsinə uyğun olması çox önəmlidir. Son pillələrdə çox gərgin mübarizə gedir. Bəzən onlar yuxarı pillələrdə olan komandalara böyük problem yaradırlar".