"Qalatasaray" azərbaycanlı futbolçuların Superliqada yerli sayılmasını istəyir

"Qalatasaray" Türkiyə Futbol Federasiyasına maraqlı bir ideya ilə müraciət etməyə hazırlaşır.

Futbolxeber.az saytının "Habertürk"ə istinadən verdiyi məlumata görə, İstanbul təmsilçisi türk dövlətlərindən olan futbolçuların Superliqada legioner sayılmamasını istəyir. "Qalatasaray" belə oyunçuların yerli statusu ilə çıxış etməli olduğunu düşünür. Klub TFF-yə müraciətində Braziliya və Portuqaliyanı nümunə göstərəcək.

Portuqaliya və Braziliya arasındakı xüsusi razılaşmalara əsasən, hər iki ölkənin vətəndaşları 2 ölkə arasında vizasız sərbəst hərəkət edə və iş icazəsi olmadan işləyə bilərlər. Bu müqavilə birbaşa olaraq yüzlərlə oyunçuya təsir edir.

Xatırladaq ki, Azərbaycan və Türkiyə arasında da viza rejimi aradan qaldırılıb.