İsveç millisinin baş məşqçisi: "Avstriya - Azərbaycan görüşündə hesab oyuna görə olmadı"

İsveç millisinin baş məşqçisi Yanne Andersson Avro-2024-ün seçmə mərhələsində Azərbaycana qarşı keçirəcəkləri oyun haqda fikirlərini bölüşüb.

Futbolxeber.az saytının məlumatına görə, o, görüş öncəsi təşkil olunan mətbuat konfransında yığmamızın futbolçularının yüksək texnikaya sahib olduğunu vurğulayıb: "Bu gün Avropa futbolunda zəif komanda yoxdur. Heç kimi zəif saymaq olmaz. Avstriya - Azərbaycan görüşündə hesab oyuna görə olmadı. İlk 20-25 dəqiqə ərzində Azərbaycan komandası çox maraqlı oyun göstərirdi. Sadəcə, müdafiədə buraxılan səhvlərdən sonra hiss olundu ki, futbolçular ruhdan düşdü və komanda uduzdu”.

Təcrübəli mütəxəssis millimizin heyətində Şeydayevi fərqləndirib: “Futbolçularınızı izləyirəm, tanıyıram. Ramil Şeydayev kimi oyunçu var. Mən belə futbolçuları bəyənirəm. Əsasən, azərbaycanlı futbolçuların yüksək texnikaya malik olmasını qeyd etmək istəyirəm. Bizə çox çətin olacaq. Amma çox yaxşı başa düşürük ki, ardıcıl ikinci oyunda xal itirməməliyik. Bu səbəbdən matça çox ciddi hazırlaşırıq. Qələbə uğrunda mübarizə aparacağıq".

Qeyd edək ki, sabah "Frends Arena"da keçiriləcək İsveç - Azərbaycan oyunu Bakı vaxtı ilə saat 22:45-də başlayacaq.