De Byazi: “Uğurlu seriyanı davam etdirmək istəyirik”

Milli komandamızın baş məşqçisi Canni De Byazi sabah Avro-2024-ün seçmə mərhələsində Avstriyaya qarşı keçiriləcək matç barədə danışıb.

Futbolxeber.az saytının məlumatına görə, oyunöncəsi mətbuat konfransında italiyalı mütəxəssis rəqibin güclü olduğunu bildirib:

“Sabah meydanda maksimum gücümüzü ortaya qoymağa çalışacağıq. Avstriya yığması çox yaxşı təşkilatlanmış güclü komandadır. Son oyunları yüksək səviyyədə keçiriblər. Heyətlərində beynəlxalq oyun təcrübəsi olan, yaxşı oyunçular var”.

De Byazi heyətdəki itkilərdən də söz açıb: “Heyətdə zədəli futbolçularımız var. Qapıçı Şahrudin Məhəmmədəliyev, müdafiəçi Bədavi Hüseynov, hücumçu Mahir Emrelinin yoxluğu komandamız üçün ciddi itkidir. Təbii ki, zədəlilərin yoxluğunu dolduracaq oyunçularımız var”.

Millimizin çalışdırıcısı qələbə seriyasını davam etdirməyə çalışacaqlarını qeyd edib: “Son matçlarda yaxşı nəticələr qazanmışıq. Uğurlu seriyanı davam etdirmək istəyirik. Qalib də gələ bilərik, məğlub da ola bilərik”.