"Kəpəz"in futbolçusu: "Sabah"dan çəkinmirik"

"Sabah"la oyunumuz çətin olacaq. Lakin görüşə hazırlığımız yaxşı əhval-ruhiyyədə gedir".

Futbolxeber.az saytının məlumatına görə, bu sözləri "Kəpəz"in futbolçusu Yusif Nəbiyev klubun feysbuk səhifəsinə açıqlamasında deyib.

O, Azərbaycan Premyer Liqasının 25-ci turunda "Sabah"a qarşı səfərdə keçirəcəkləri matç barədə danışıb. 25 yaşlı müdafiəçi deyib: "Yaxşı motivasiya ilə hazırlaşırıq. Çünki ardıcıl 2 oyunluq uğurlu seriyamız var. "Sabah" güclü komandadır. Amma sözün əsl mənasında biz onlardan çəkinmirik. Öz oyunumuzu oynayacağıq. 1 xal və ya 3 xal, fərqi yoxdur. Ən azından xalla qayıtmaq istəyirik. Qələbə qazansaq, daha yaxşı olar. Amma 1 xal da bizim üçün yaxşı nəticədir. Çünki "Sabah" güclü rəqibdir".

Nəbiyev paytaxt təmsilçisinə qarşı keçirdikləri son matçı (2:2) da xatırlayıb: "Bizim bu komanda ilə Gəncədəki oyunumuz ağır keçdi. Son anda qələbəni əldən verdik. Çünki 2:1 hesabı ilə öndə idik. Son dəqiqələrdə səhv etdik, qol buraxdıq. Biz həmin oyunda 2 xal itirdik. Bu görüşdə həmin oyunun əvəzini çıxmağa çalışacağıq. Biz hər oyuna bir cür hazırlaşırıq. Baş məşqçimiz Tərlan Əhmədovun verdiyi tapşırıqlar var. Onların üzərində çalışırıq. Tam ciddi şəkildə hazırlaşırıq. Məşqçimiz bizə nə deyirsə, onu yerinə yetirməyə çalışacağıq ki, yaxşı nəticə qazanaq".

Futbolçu sonda azarkeşlərə də səslənib: "Azarkeşlərin daim bizim yanımızda olmasını istəyirik. Çünki azarkeş böyük bir amil, üstülükdür. Bu, bizim ev oyunlarımızda görünür. İnşallah, səfər oyunumuza da gələrlər, bizə dəstək olarlar. Biz istəyirik ki, onlar həmişə yanımızda olsunlar".

Qeyd edək ki, sabah keçiriləcək "Sabah" - "Kəpəz" görüşü saat 18:30-da başlayacaq.