Qurban Qurbanov: “Bu gün çox yaxşı “Neftçi”yə qarşı oynayırdıq”

“Qarabağ”ın baş məşqçisi Qurban Qurbanov Azərbaycan Premyer Liqasının 24-cü turu çərçivəsində “Neftçi”yə qarşı keçirdikləri oyunu (1:1) şərh edib.

Futbolxeber.az saytının məlumatına görə, təcrübəli mütəxəssis matçdan sonra keçirilən mətbuat konfransında bunları deyib:

 “Maraqlı oyun alındı. Dinamika var idi. Bizim üçün heç də asan deyildi. İstədiyimiz formada deyildik. Futbolçularım sona qədər xarakter göstərdilər. Onları təbrik edirəm. Bu gün çox yaxşı “Neftçi”yə qarşı oynayırdıq. Düşünürəm ki, vacib xal qazandıq. Qarşıdakı günlərdə çatışmayan elementləri yaxşılaşdıracağıq”.

Qurbanov komandasının qapıçısı ilə rəqib azarkeşlər arasında yaşanan insidentə də toxunub: “Lukaya hirsləndim. Bir az sərt danışdım. Belə hallar olur. Azarkeşlər də bəzən nalayiq ifadələr işlədirlər. Futbol düşünülməmiş epizodlar üzərində qurulub. Biz azarkeşlər üçün oynayırıq".

Çalışdırıcı heyətdəki itkilərdən də söz açıb: "Dünəndən Maksim Medvedevin qızdırması oldu. Oyundan qabaq da vəziyyət eyni idi. Bədavi məcburiyyətdən o cinahda oynadı. Oyunun gedişatına görə baxacaqdım".

O, hava şəraitinin oyuna təsir etdiyini qeyd edib: "Bəzi düşüncələr meydançada gecikirdi. Hava şəraiti oyuna təsir edirdi. İlk hissə qapıya, hakimə, futbolçulara baxırdım. Fasilədə oyunçulara tapşırıq verməkdə də çətinlik çəkirdim".

Mütəxəssis heyətdəki dəyişikliklər haqda da danışıb: "Hər oyunçunun missiyası fərqlidir. Əsas heyət futbolçuları istəklərimizi rahatlıqla tətbiq edirlər. 1-2 dəyişiklik çox təsir etməsə də, 5-6 dəyişiklik özünü göstərir. Hər bir halda, bütün futbolçular eyni cür ola bilməz. Bu günə qədər yanılmamışam. Lazımi nəticələri əldə etmək üçün oyunçularım əziyyət çəkirlər".

Q.Qurbanov "Neftçi"nin qol epizodunda etiraz etməsi ilə bağlı sualı belə cavablandırıb: “Neftçi” qol vuranda etiraz etmədim. Sadəcə oyundankənar vəziyyət olması ilə bağlı fikir bildirdim. Dedilər ki, qaydalar çərçivəsində vurulub. Bəzi oyunlarda rəqib daha hazırlıqlı olur. Cicanın son vuruşları çox yaxşı idi”.