“Huner Group”dan “Turan Tovuz”un İdarə Heyətində kimlər təmsil olunacaq?

Ötən həftə “Huner Group” şirkəti ilə “Turan Tovuz” arasında 4,5 illik müddətinə sponsorluq müqaviləsi imzalandı. Rəsmi müqavilə imzalandıqdan sonra “Huner Group”un təsisçisi və baş direktoru Ehtiram Quliyev şirkətdən 2 nəfərin Tovuz klubunun İdarə Heyətində təmsil olunacağını demişdi.

Futbolxeber.az saytının məlumatına görə, həmin 2 nəfərdən birinin daha əvvəl “Qəbələ”dəki fəaliyyəti ilə tanınan Səməd Nəsibovun olacağı gözlənilir. İkinci şəxsin kimliyi isə hələlik qeyri-müəyyəndir.

Saytımıza açıqlamasında Səməd Nəsibov hələlik klubda təmsil olunacağının dəqiq olmadığını bildirib. O qeyd edib ki, hazırda bu barədə hər hansı qərar qəbul edilməyib.

S.Nəsibov kimi, “Turan Tovuz”un mətbuat xidmətinin rəhbəri Süleyman Tağıyev də Futbolxeber.az saytına açıqlamasında hələlik sponsor şirkətinin təmsilçilərinin müəyyənləşmədiyini bildirib.

Fərəc ASLANOV