Tərlan Əhmədov: “Bu, məni sevindirir”

“Həftəlik məşq mərhələsində bu oyunun çətin keçəcəyini uşaqlara başa salırdım. Turnir cədvəlində iki qonşu komanda qarşılaşırdı, rəqib bizdən çox da uzaqlaşmamalı idi. 4 ildən sonra ikinci ev oyununda Gəncə azarkeşlərinə qələbə bəxş etmək istəyirdik. Oyunun ilk dəqiqələrindən futbolçuların özündə həyəcan, təzyiq hiss olunurdu. Oyunumuz alınmırdı. Amma getdikcə çalışdığımız qədər rəqibi əks hücumda tutub oyunu öz tərəfimizə çevirməyə səy göstərirdik. Bu da tədricən öz bəhrəsini verdi”.

Futbolxeber.az saytının məlumatına görə, bu sözləri “Kəpəz”in baş məşqçisi Tərlan Əhmədov Azərbaycan Premyer Liqasının XII turunda “Səbail” üzərində 3:0 hesablı qələbə qazandıqları oyundan sonra deyib.

Qələbəyə baxmayaraq, Əhmədov komandasının səhvlərinin çox olduğunu bildirib: “Düzdü, səhvlərimiz həddindən artıq çoxdur. Qələbədən dolayı futbolçularımı təbrik edirəm. Azarkeşlərə sona qədər bizə dəstək olduqlarına görə təşəkkür edirəm. Hər halda bu gün fanatların bizə dəstəyi ikinci stimul oldu. Heyətimizdəki kasadlığa baxmayaraq komanda yaxşı mübarizə aparır. İstədiyim tam formaya nail ola bilməmişik. Bunun üçün zaman lazımdır. Ümumillikdə komanda istəklidir. Mübarizə aparır, yaxşı oyun nümayiş etdirməyə çalışır və bu, məni sevindirir".