Rəşad Sadıqov: "Futbolçularımızda böyük diqqət, rəqibə böyük hörmət gördüm"

"Çətin oyun alındı. Həftəboyu da futbolçulara deyirdim ki, rəqib son pillədə ola bilər, amma son turlarda göstərdiyi oyun və əzmkarlıq yaxşı idi. Bunu mütləq nəzərə almalıydıq. Futbolçularımızda da böyük diqqət, rəqibə böyük hörmət gördüm. İlk hissə bizim üçün ağır idi. Amma bir neçə qol vəziyyəti yaratdıq, istifadə edə bilmədik. İkinci hissədə oyun daha da sürətləndi. Standart vəziyyətdən fərqləndik. Önəmli, vacib qələbə qazandıq. Futbolçularımı təbrik edirəm. Bu oyunu görmək istəyirdim. 90 dəqiqə stabil, dinamik oynayan komanda gördüm".

Futbolxeber.az saytının məlumatına görə, bu sözləri "Zirə"nin baş məşqçisi Rəşad Sadıqov Misli Premyer Liqasının 9-cu turunda "Şamaxı"ya 1:0 hesabı ilə qalib gəldikləri oyundan sonra keçirilən mətbuat konfransında deyib.

O,  qələbə qolunu vuran Dimitrios Çantakiasın çox danışdığını söyləyib: "Bu haqda onunla çox danışırıq. Bəzən faydası olur, bəzən olmur. Həyatda  sakit biridir. Məşqlərdə heç kimlə konflikti olmur. Onu hamıdan çox istəyirlər. Oyun başlayanda dəliyə çevrilir. Daha səbirli olmalıdır".

Mütəxəssis bugünkü oyundan və nəticədən razı qaldığını vurğulayıb: "Əvvəlki matçlarda bəzi oyun kəsikləri məni qane etmirdi. "Turan Tovuz"la 60-cı dəqiqədən sonrakı oyunumuz məni qane etməmişdi. Amma bu gün sona qədər oynadılar".

O, Vaqif Paşayevi komandaya məsləhətçi, ağsaqqal kimi dəvət etdiklərini söyləyib: "Amma müəyyən problemlər yaşayırdıq. Bu, kateqoriya ilə bağlı idi. Pandemiya dövrü idi, xəstələnirdik. Həmin vaxtda ondan xahiş etdim ki, komandanın içində olsun və mən olmayanda, əvəzləsin. Vəzifəsindədir. Məsləhət edirik, onunla danışırıq".

R.Sadıqov turnir cədvəlindəki vəziyyətlə əlaqədar bildirib: "Sabah" əsas rəqibləri üzərində qələbələr qazanıb. Hər dövrəyə 16-18 xal yaxşı nəticədir. Müəyyən oyunlar oldu ki, mübarizədən qopduq. Turnir cədvəlinə baxdıqda, üçlükdəkilər favoritdir. Çox istəyərəm ki, komandam avrokuboklardan kənarda qalmasın. Bundan ötrü sona qədər mübarizə aparacağıq. Hər komandanın enişi və yüksəlişi olacaq. Bu iki oyun kritik idi. 1:7 uduzmuşduq, komandanın toparlanıb əzmkar rəqibləri üzərində qələbə qazanması vacib idi. "Sabah"a qarşı səfərdə oynayacağıq. Əlimizdən gələni edəcəyik ki, uğurlu nəticə ilə qayıdaq".

Mütəxəssis "Şamaxı"ya icarəyə verilən Cəlal Hüseynov haqda deyib: "Qərarı Cəlalın özünə buraxmışdım. O, getdikdən sonra mərkəz müdafiəçisi transfet etdik. Getməsəydi, etməzdik. Qərarını da dəstəklədim. Bu gün yaxşı oynadı. Heç kim zəmanət verə bilməz ki, "Şamaxı" sonuncu olacaq. İnanıram ki, daha yuxarı pillələr uğrunda mübarizə aparacaqlar. Cəlala da uğurlar arzulayıram. İnanıram ki, komandamıza döndükdə, daha yaxşı vəziyyətdə olacaq".