"Rəvan"ın seriyası qırıldı

Azərbaycan Premyer Liqasının 8-ci turu çərçivəsində "Rəvan” evdə AZAL komandasını qonaq etdi və hesab açılmayınca hər iki komanda 1 xal qazandı. Futbolxeber.az-ın məlumatına görə, bu 0:0-ın xüsusi özəlliyi də var. Belə ki, "Rəvan"ın Premyer Liqa matçlarında ilk dəfə AZAL-a qol vura bilmədiyi oyun 1 ildən çox davam edən seriyanın qırılması ilə nəticələndi. 2012/13 mövsümünün 4-cü turu çərçivəsində "Qarabağ”a qarşı keçirilmiş oyun 24 avqust 2012-ci il tarixinə təsadüf edir. Başqa sözlə, "Rəvan” Premyer Liqada düz 401 gündən sonra 0:0 oynadı. Maraqlıdır ki, "Rəvan" AZAL klubunun qol seriyasının qırılmasının baiskarı olub. Buna qədər "təyyarəçilər” Premyer Liqada ardıcıl 19 oyun meydanı qol vuraraq tərk etmişdi.

Evdə ardıcıl ikinci heç-heçəsinə razılaşan "Rəvan” üçün bu oyunun digər önəmli cəhəti komandanın Azərbaycan çempionatları çərçivəsində 120-ci görüşünü keçirməsi oldu. Belə ki, I divizionda 48 matça çıxan "aslanlar” Premyer Liqada 72-ci görüşünü keçirdi. Yubiley oyununda 24-cü heç-heçənin qeydə alındığını da qeyd edək. Ümumi balans idə belədir: +53 =24 -43; 174-153. Maraq üçün "Rəvan"ın Azərbaycan çempionatları çərçivəsində evdə keçirdiyi 60-cı qarşılaşmada 14-cü dəfə "sülh” bağladığını da bildirək.