"Elə bu gün Pantiçlə danışacağam"

"Yox, zədəli deyiləm. Özümü yaxşı hiss edirəm. Məşqlərdə də tam gücümlə çalışıram. Oynamağımın səbəbini bilmirəm. Yaxşı olar ki, bunu məndən yox, Pantiçdən soruşasınız". Futbolxeber.az saytına verdiyi açıqlamada bu sözləri "Bakı"nın üzvü Risto Ristoviç deyib.

Serbiyalı futbolçu geridə qalan 8 tur ərzində cəmi 1 dəfə meydana çıxıb. İlk turda "Qəbələ"yə qarşı baş tutan matçda Ristoviç 85-ci dəqiqədə meydana daxil olub. Üçüncü turda "Rəvan"a qarşı keçirilən oyunda isə Ristoviç sona kimi ehtiyatda qalıb. Qalan 6 matçda isə serbiyalı yarımmüdafiəçinin adı "18-liy"ə düşməyib.

Ristoviç oynamaması barədə baş məşqçi Milinko Pantiçlə danışacağını qeyd etdi: "Baş məşqçi ilə aramda heç bir problem yoxdur. Yenə deyirəm, oynamamağımın səbəbini bilmirəm. Bu haqda onunla söhbət etməmişəm. Amma elə bu gün Pantiçlə bu barədə danışacağam".