"Frayburq"un baş məşqçisi: "Qarabağ" güclü komandadır"

"Frayburq"un (Almaniya) baş məşqçisi Kristian Ştrayx Avropa Liqasının qrup mərhələsinin 1-ci turunda evdə "Qarabağ"a qalib gəldikləri matç (2:1) barədə danışıb.

Futbolxeber.az saytının məlumatına görə. alman mütəxəssis oyundan sonra təşkil olunan mətbuat konfransında Ağdam təmsilçisinin güclü komanda olduğunu deyib:

"Rəqibi analiz etmişdik. Onların Çempionlar Liqasının təsnifat mərhələsindəki görüşlərini izləmişdik. "Qarabağ" güclü komandadır. Onların güclü futbolçuları var. Bu matçın belə keçəcəyini gözləyirdim. İlk 20 dəqiqədə çox yaxşı oynadıq. Qələbəyə layiq olduğumuzu düşünürəm".

Ştrayx "Qarabağ"ın baş məşqçisi Qurban Qurbanovla oyundan əvvəl və sonra söhbət etməsi barədə bunları deyib: 

"Ona bildirdim ki, Bakıya gedəcəyim üçün və belə rəqibə qarşı mübarizə apardığımız üçün şadam. Azərbaycana getmək istəyirəm. Bu ölkənin yeməyinin dadına baxmışam. Sizin regionla maraqlanıram. Hətta Gürcüstana da getmək istəyirdim. Amma pandemiya vaxtına düşdüyü üçün alınmadı".

Çalışdırıcı onu da qeyd edib ki, G qrupundakı bütün komandalar eyni gücdədir: "Qrupda favorit yoxdur. Hər 4 komanda eyni gücdədir. Hələlik kimin birinci və ya dördüncü olacağını deyə bilmərəm. Amma bilərəm ki, onların arasında da fərq çox olmayacaq".