"Sumqayıt"ın dünənki qazancı...

Dünən Azərbaycan futbolunun gündəmini "Qarabağ" zəbt etsə də, "Sumqayıt"ı da yaddan çıxarmaq olmaz. "Gənclik şəhəri"nin təmsilçisi dünən Azərbaycan klublarının çox nadir hallarda bacardığını etdi - xarici kluba futbolçu satdı. 

Höccət Haqverdi "Traktor"a azad agent kimi qoşulmadı. Bu keçiddən "Sumqayıt" pul qazandı. Məbləğin nə qədər olduğunu bilmirəm, əslində bu, elə də önəmli deyil. Əsas odur ki, klub futbolçu satışından gəlir əldə etdi ki, bu da Azərbaycan futbolunda nadir hadisədi.

Xatırlamağa çalışsam da, Mamadu Kane və Sabir Buqrindən başqa kimsə yadıma düşmür. Ötən il "Neftçi" yarımmüdafiəçilərini Yunanıstanın "Olimpiakos" və Tunisin "Esperansa" klublarına satmışdı. Flaqmanın təkcə Kanenin keçidindən gah 500 min, gah 800 min avro gəlir əldə etdiyi deyilirdi. Amma yuxarıda da qeyd etdiyim kimi, bu cür keçidlərdə pulla yanaşı, ölkə futboluna fayda, prestij məsələsi də az rol oynamır. 

Keçən il "Sumqayıt" Xəyal Nəcəfovun "Neftçi"yə satışından Azərbaycan səviyyəsində heç də pis sayılmayan məbləğ əldə etmişdi. İndi də Höccət. Görünür ki, klubda düzgün iş gedir. Bəzən dağıstanlı, rusiyalı, iranlı futbolçuların milliləşdirilməsinə görə "Sumqayıt" tənqid hədəfi olsa da, Riad Rəfiyevin gəlişindən sonra klubdakı müsbətə doğru dəyişiklər göz önündədir. 

Bu yaxınlarda böyük perspektiv vəd edən serb müdafiəçi "Sumqayıt"a transfer olundu. Böyük ehtimalla, yaxın gələcəkdə o da hansısa kluba satılacaq. Ümidləri doğrultsa, yəqin ki, həmin klub "Traktor"dan da güclüsü olacaq və "Sumqayıt" bu keçiddən indikindən də çox qazanacaq. 

Əslində, belə də olmalıdı. Əvvəl-axır Azərbaycan klubları bu yola üz tutacaqlar. Müasir futbol biznesdi. Dünyada Azərbaycandakı kimi təkcə pul xərcləmirlər, həm də futboldan pul qazanırlar. 

Bir neçə il öncə "Qəbələ" bu yolu tutmuşdu. Həmin vaxt əyalət klubu qısa müddətdə 3 futbolçunun digər Azərbaycan klublarına satışından təxminən yarım milyon manat gəlir əldə etmişdi. Təbii ki, 500 min klubun heç yarımillik büdcəsi deyil, razıyam. Amma yenə də əlavə gəlirdi. Belə görünür ki, bu gün də "Qəbələ"nin başlatdığı işi "Sumqayıt" davam etdirir və istər Xəyalın, bu gün isə Höccətin satışı göstərir ki, "Gənclik şəhəri"nin təmsilçisi düz yoldadır...

İBRAHİM