“0:2-nin əvəzini çıxmaq olar”

“Çox danışmaq lazım deyil. Bu oyun bizim üçün vacibdir. Meydanda istəkli və aqressiv olmalıyıq. 0:2 hesablı məğlubiyyətin əvəzini çıxmağa çalışacağıq. Qələbə qazanmaq üçün ilk görüşdəkindən daha yaxşı oynamalıyıq”.

Futbolxeber.az saytının məlumatına görə, bu sözləri “Neftçi”nin kapitanı Emin Mahmudov deyib. 

Sabah Konfrans Liqasının II təsnifat mərhələsi çərçivəsində “Aris”ə qarşı keçiriləcək oyun öncəsi mətbuat konfransına qatılan təcrübəli yarımmüdafiəçi 0:2 hesabının arzuolunmaz olması ilə bağlı sualı belə cavablandırıb: “Hesabın fərqi yoxdur. İlk görüşdə hələ yaxşı ki, son epizodda qol vura bilmədilər, 0:3 ola bilərdi. Biz sabah geridönüş etməyə çalışacağıq. Düşünürəm ki, 0:2 hesablı məğlubiyyətin əvəzini çıxmaq olar”.

Mahmudov yeni baş məşqçi barədə deyib: “Hələ 3-4 həftə keçib. Bir-birimizi daha yaxşı tanımalıyıq. Hələ tam onun istədiyi kimi oynaya bilmirik. Yeni oyunçular var, bir-birimizə tam uyğunlaşmamışıq. Düşünürəm ki, bir ay ərzində baş məşqçini daha yaxşı başa düşəcəyik. İndiki məqamda isə bizi yalnız nəticə qane edir. Məşqçi hətta istəməsə də, nəticə tələb edən oyunu göstərməliyik. Hamımız bu oyunun əhəmiyyətini dərk edirik. Motivasiyamızı sabah hamı görəcək. Qələbə üçün əlimizdən gələni edəcəyik”.