De Byazi: "Qol vurmursansa, qələbə qazana bilmirsən"

"Oyuna pozitiv şəkildə başladıq. Ötən oyunda olduğu kimi, rəqib qapısına 15 zərbə vurduq. Təəssüf ki, qol vurmursansa, qələbə qazana bilmirsən".

Futbolxeber.az saytının məlumatına görə, bu sözləri UEFA Millətlər Liqası çərçivəsində Belarusa qarşı keçirilən oyundan sonra milli komandamızın baş məşqçisi Canni De Byazi deyib. 

İtaliyalı mütəxəssis qolsuz heç-heçəni belə şərh edib: "Oyunu bir nəfər azlıqda tamamlamağımızı nəzərə alsaq, nəticəni baxımından razı ola bilərik. Amma buraya qələbə qazanmaq üçün gəlmişdik.

Komandanın oyunundan çox razı qaldım. Hiss edirəm ki, günü-gündən irəliləyiş var. Artıq topla daha rahat oynayırıq, topu hara gəldi vurmuruq, qol imkanları yaradırıq. İlk hissədə 3-4 qol imkanımız oldu, istifadə edə bilmədik. Son vuruşlarda çatışmazlıqlar var. Komanda kim inkişaf edirik".

Yığmamızın çalışdırıcısı 3 gün sonra Bakıda Slovakiyaya qarşı keçiriləcək qarşılaşma haqda da danışıb: "Bizi qrupun ən güclü komandasına qarşı ağır oyun gözləyir. Əminəm ki, meydana kim çıxacaqsa, yaxşı nəticə qazanmaq üçün sona qədər mübarizə aparacaq".