De Byazi: “Hazırda ən hazır futbolçular milliyə dəvət olunub”

“İnanıram ki, budəfəki Millətlər Liqası fərqli olacaq”.

Futbolxeber.az saytının məlumatına görə, bunu UEFA Millətlər Liqası çərçivəsində sabah keçiriləcək Qazaxıstan-Azərbaycan oyunu öncəsi təşkil olunan mətbuat konfransında millimizin baş məşqçisi Canni De Byazi deyib.

İtaliyalı mütəxəssis heyətlə bağlı bildirib: “Artıq özüm üçün heyəti müəyyənləşdirmişəm. Gələcəkdə bu komandaya düşəcək oyunçular var. Hazırda ən hazır futbolçular milliyə dəvət olunub”.

De Byazi budəfəki Millətlər Liqasında daha yaxşı çıxış edəcəyimizə inanır: “Yeni turnirə başlayırıq. İnanıram ki, səhvlərimizdən dərs götürüb, bu dəfə daha yaxşı çıxış edəcəyik. Çünki komandamın buna potensialı var.

Güclü qrupda yer almışıq. Slovakiya qrupun aşkar favoritidir. Digər üç komanda hər xal üçün mübarizə aparacaq. Maksimum xallar toplamağa çalışacağıq”.

Millimizin çalışdırıcısı sabah oyunun keçiriləcəyi “Astana Arena”nın ot örtüyünün süni olması ilə bağlı sualı belə cavablandırıb: “Düşünürəm ki, qazonun süni olması problem olmamalıdır. Azərbaycanda da bu cür meydançalar var. Əsas çatışmazlıq kimi təqvimin sıx olmağını qeyd edə bilərik. Çünki oyunlar üç gündən bir olacaq”.