Çempion azarkeş “Neftçi”nin qonağı oldu

“Gaming League Azerbaijan”ın keçirdiyi kompüter oyunları üzrə XV Milli Çempionat çərçivəsində keçirilmiş FİFA21 yarışının qalibi Cavid Qurbanov “Neftçi”nin bazasında qonaq olub.

Futbolxeber.az saytının məlumatına görə, Qurbanov futbolçuların hazırlığını canlı izləməklə “Neftçi” ailəsində unudulmaz gün keçirib.

O, “Neftçi”nin düşərgəsində olduğu müddət ərzində baş məşqçi Samir Abbasov, futbolçular Keysuke Honda, Səlahət Ağayev, Emin Mahmudov digərləriylə şəxsən görüşmək, şəkil çəkdirmək imkanı qazanıb.

“Gaming League Azerbaijan” təşkil etdiyi layihə çərçivəsində Cavid Qurbanov «Neftçi»nin futbolçusu Namiq Ələsgərovla FİFA21 oyununda bir-birinə rəqib olub.

Qeyd edək ki, FİFA21 turnirinin qalibi azarkeşi olduğu komandanın qonağı olmaqla Azərbaycan idman tarixində ilkə imza atıb.

“Gaming League Azerbaijan” layihənin reallaşmasında göstərilən dəstəyə görə «Neftçi» Peşəkar Futbol Klubuna təşəkkür edir.

“Gaming League Azerbaijan” (GLA) layihəyə dəstək olan Azərbaycan Kiberidman Federasiyası, Gənclər və İdman, eləcə də Nəqliyyat, Rabitə və Yüksək Texnologiyalar nazirliklərinə minnətdarlığını bildirir.