“Neftçi” transfer bombasına hazırlaşır: “Hazırda onunla danışıqlar gedir”

Dünya səviyyəli ulduz, Yaponiya millisinin sabiq üzvü Keysuke Honda karyerasını “Neftçi”də davam etdirə bilər.

“Ağ-qaralar”ın İnformasiya və ictimaiyyətlə əlaqələr departamentinin rəhbəri Rüstəm Allahverdiyev ulduz futbolçunun keçidi ilə bağlı Futbolxeber.az saytına bunları deyib:

“Hondanın “Neftçi”yə keçidi ilə bağlı yayılan xəbər doğrudur. O, “Neftçi”yə meneceri tərəfindən təklif olunub. Bu təklif maraqla qarşılanıb və hazırda danışıqlar gedir. Lakin hələlik rəsmi bir şey yoxdu”.

Qeyd edək ki, 34 yaşlı yarımmüdafiəçi karyerası ərzində “Naqoya” (Yaponiya), “Venlo” (Niderland), ÇSKA (Moskva, Rusiya), “Milan” (İtaliya), “Paçuka” (Meksika), “Melburn Viktori” (Avstraliya), “Vitess” (Niderland) klublarında forma geyib. 2020-ci ildə Braziliyanın məşhur “Botafoqo” klubunda çıxış edən Honda 18 oyunda 2 qol vurub.

ÇSKA-nın heyətində 2 dəfə ölkə çempionu olan, 1 dəfə ölkə kuboku və Superkubokunu qazanan yapon futbolçu “Milan”la birgə 2016-cı ildə İtaliya Superkubokunu da sahib çıxıb. 2011-ci ildə millinin heyətində Asiya kubokunun qalibi olan Honda həm də dünya çempionatlarında ən çox qol vuran yapon futbolçudur - 4 qol.