“Neftçi” - “Qəbələ”: 55-ci oyun

Azərbaycan Premyer Liqasının XVI turu çərçivəsində “Qəbələ” “Neftçi” ilə görüşəcək.

Futbolxeber.az saytının məlumatına görə, bu, rəqiblərin ümumilikdə 55-ci dueli olacaq. İndiyədək komandalar 54 dəfə üz-üzə gəlib. Aktivində 17 qələbə olan “Qəbələ” 13 heç-heçə edib və 24 matçda uduzub. Rəqib qapısından 67 top keçirən “qırmızı-qaralar” 78 qol buraxıb.

“Bakcell Arena”dakı görüş Premyer Liqa çərçivəsində yubiley - 50-ci görüş olacaq. Əvvəlki 49 qarşılaşmada 16 qələbəsi olan “Qəbələ” 10 dəfə bir xalla kifayətlənib və 23 dəfə uduzub. Rəqib qapısına 60 dəfə yol tapan “qırmızı-qaralar” 72 top buraxıb.

28-ci dəfə “Neftçi” ilə səfərdə görüşəcək “Qəbələ” rəqib meydanında 9 dəfə qalib gəlib. 7 heç-heçə və 11 məğlubiyyəti olan “Qırmızı-qaralar” 34 qol vurub, 36 top buraxıb.

Xatırladaq ki, fevralın 20-də “Bakcell Arena”da keçiriləcək matç 18:00-da başlayacaq.