“Azərbaycan çempionatı tamamilə Avropa səviyyəsindədir”

“Burada hər şey çox xoşuma gəlir. Çox yaxşı komandalar var, Avropa Liqasına düşmək üçün yarışırıq, klublardakı oyunçular keyfiyyətlidir, maaşlar da çoxdur. Hamı avrokuboklarda çıxış etmək üçün çalışır”.

Futbolxeber.az saytının məlumatına görə, bu sözləri "Səbail" in iranlı yarımmüdafiəçisi Bəxtiyar Rəhmani ölkəsinin mətbuatına açıqlamasında komandası və Azərbaycan Premyer Liqası haqqında təəssüratlarını danışarkən deyib. 29 yaşlı oyunçu çempionatın yüksək səviyyədə olduğunu bildirib:

“Qeyd etmək istərdim ki, həm təşkilati, həm də futbol baxımından Azərbaycanın çox peşəkar bir liqası var. Çempionatda rəqabət yüksəkdir. Bu, mənim üçün həqiqətən çox yaxşıdır”.

Futbolçu Premyer Liqamızda İrandan daha çox futbolçunun oynayacağına ümid etdiyini deyib:

“Ümid edirəm ki, İran Premyer Liqasından olan futbolçular bir gün Azərbaycan çempionatında oynayacaq və liqanın nə qədər keyfiyyətli olduğunu və burada oynamaq nə qədər xoş olduğunu görəcəklər. Əvvəllər Qətərdə oynayırdım və prinsipcə dünyanın bir çox yerlərini görürdüm, amma futbol şəraiti baxımından Azərbaycan tamamilə Avropa səviyyəsindədir.

Burada təxminən 5-6 İranlı oyunçu var. Məsələn, "Səbail" də Peyman Keşavarz da mənimlə oynayır. “Traktor”da bir müddət birlikdə oynamışıq, yaxşı və texniki futbolçudur, çox bəyənirəm və gələcəkdə mütləq onun haqqında daha çox şey eşidəcəksiniz".