Azərbaycan Premyer Liqası iyunun 21-də start götürəcək!

Koronavirus pandemiyası səbəbindən martdan yarımçıq dayandırılan Azərbaycan Premyer Liqasının davam etdirilib-etdirilməyəcəyi son günlər geniş müzakirələrə səbəb olub.

Futbolxeber.az saytının məlumatına görə, Nazirlər Kabineti yanında Operativ Qərargahın şənbə və bazar günləri sərt karantin elan etməsi, evdən bayıra çıxmaq qadağasının qoyulması müəyyən söz-söhbətlərə yol açıb.

Dünən isə məlum oldu ki, Peşəkar Futbol Liqası Premyer Liqa iştirakçılarına məktub göndərib. Hətta bu məktublara veriləcək cavablara əsasən çempionatın oyunlarının davam etdirilib-etdirilməyəcəyini iddia edənlər də tapıldı. Amma bütün bunlar əsassız iddialardı.

Birincisi, klublara Peşəkar Futbol Liqası tərəfindən göndərilən sorğu xarakterli bir məktubdur. Komandaların fikirlərini rəsmi öyrənmək PFL üçün önəmlidir. Komandalara ayrılmış 21 gün məşq vaxtının bir neçə gününü sərtləşdirilmiş karantin rejiminə görə məşq edə bilmirlər. Meydana çıxa biləcək problemləri bilmək üçün PFL klubların rəsmi cavabını öyrənir. Çünki çempionatda çıxış edən məhz klublardı. Yəni bu məktuba veriləcək cavabların çempionatın start götürüb-götürməməsi ilə əlaqəsi yoxdu.

Ən əsası isə Azərbaycan Premyer Liqasının taleyi ilə bağlı qərar qəbul etmək nə klubların, nə AFFA-nın, nə də PFL-in səlahiyyətindədi. Çempionatın oyunlarının davam etdirilib-etdirilməməsi haqda yalnız İcraiyyə Komitəsi qərar qəbul edə bilər. İcraiyyə Komitəsi də bu haqda yekun qərarını verib və PFL-in tərtib etdiyi təqvimə əsasən Azərbaycan Premyer Liqasının oyunları iyunun 21-də start götürür!

Bir sözlə, yayılan xəbələrin, ortaya atılan iddiaların heç bir hüquqi əsası yoxdur. Sabah nə olacağı heç kim deyə bilməz, amma bu an üçün rəsmi qərar odur ki, 21 iyundan Premyer Liqamızın oyunları davam etdiriləcək.