”Xəzər Lənkəran” məşqlərini tamamlayıb yola düşdü

Premyer Liqanın V turunda “Qəbələ” klubunun qonağı olacaq “Xəzər Lənkəran” Lənkəranda son üç gün ərzində davam edən hazırlığını tamamlayıb. Futbolxeber.az-ın klubun rəsmi saytına istinadən verdiyi məlumata görə, bu gün səhər məşqini ehtiyat meydançada keçirən komanda 1 saat 20 dəqiqə ərzində fiziki və taktiki çalışmaları yerinə yetirdi. Yeni transferlər Deyvid Sakkoni və Edu Oriolun da iştirak etdiyi məşq prosesi yetərincə maraqlı alındı və futbolçuların istəkli olması, tapşırıqları düzgün yerinə yetirməsi məşqçilər korpusunu da razı saldı. Məşqin ardından “Xəzər Lənkəran” Qəbələ şəhərinə yola düşdü. Xatırladaq ki, “Qəbələ” - “Xəzər Lənkəran” matçı avqustun 31-də keçiriləcək. Matçın ardından "Xəzər Lənkəran" Qəbələdə daha 4 gün qalaraq təlim məşq toplanışı keçirəcək.