Mirsahib Abbasov: "Səbail"lə görüşdə məqsədimiz qələbə qazanmaqdı"

“Səbail”lə görüşdə məqsədimiz qələbə qazanmaq olacaq. Məncə, istədiyimizi həyata keçirə bilsək, qalib gələcəyik, buna gücümüz də çatar”. Bu sözləri Futbolxeber.az saytına açıqlamasında “Zirə”nin hücumçusu Mirsahib Abbasov deyib.

Forvard Premyer Liqanın 10-cu turu çərçivəsində “Səbail”ə qarşı keçirəcəkləri oyun barədə danışıb. O, “Bakcell Arena”da ev sahibi kimi oynamaqlarının onlar üçün problem olmayacağını bildirib: “Bakcell Arena”da oynamağımızın elə də fərqi yoxdu. Çünki bu stadion rəqib üçün də yad arenadı. Oyunun harada olmasından asılı olmayaraq matç keçirilməlidi. Düzdü, Zirədə olsa daha yaxşı idi. Amma məkan elə də vacib deyil, əsas odu ki, istəyimizi həyata keçirək”.

Abbasov “Səbail”i də dəyərləndirib: “Düzünü desəm, rəqibin heyətindən kiminsə adını çəkmək, xüsusi fərqləndirmək istəməzdim. Ancaq komanda şəklində çox yaxşıdılar. Birinci dövrədə məhz “Səbail”ə texniki məğlubiyyəti çoxdan unutmuşuq. Bunun budəfəki oyunumuza heç bir təsiri olmayacaq. “Səbail”i məğlub etməliyik, başqa yolumuz da yoxdu”.