Malta millisinin üzvü: "Azərbaycan məni heç nə ilə təəccübləndirmədi"

Malta milli komandasının futbolçusu Paul Fenex Futbolxeber.az saytına açıqlama verib.

Millisinin ən təcrübəli oyunçularından olan Fenex Azərbaycanla görüşdə qələbəyə oynadıqlarını bildirib. Onun fikrincə, qələbə qazanmaqlarına şanssızlıq mane olub: "Azərbaycanla oyunda bizi yalnız qələbə qane edirdi. Əslində Azərbaycana qalib gəlmək asan olmayacaqdı. Çünki bilirdik ki, çətin komandadı və yaxşı oyunçuları var. Amma birinci qolu vurandan sonra çox oturduq müdafiədə. Əgər hücumlarımıza davam etsəydik ikinci qolu da vurardıq. Əla şansımız var idi, ikinci qolu vura bilərdik, sadəcə bəxtimiz gətirmədi". 

31 yaşlı oyunçu millimizin onu heç nə ilə təəccübləndirmədiyini də bildirib: "Azərbaycanın daha güclü olduğunu düşünürdüm. Xeyr, Azərbaycan məni heç nə ilə təəccübləndirmədi. Rəqibin topla yaxşı oynayan oyunçuları var idi ki, biz də onların qarşısını ala bildik. Vaxtı uzatmaq? Biz vaxtı uzatmırdıq, sadəcə müdafiə olunurduq deyə komanda yoldaşlarımdan zədələnənlər olurdu. Bu futbolda normaldı. Biz özümüz də Azərbaycana qalib gəlmək istəyirdik. Sadəcə Farer adalarına məğlubiyyətdən sonra bir xal da bizə inam verəcək. Əsas odu ki, şanslarımız davam edir, sona kimi oynayacağıq".