"Karapetyanı Azərbaycana aparmamağı bizə heç kim qadağan etməmişdi"

“Proqress”in baş məşqçisi Paolo Amodio “Qəbələ” ilə oyun haqda danışıb.

Futbolxeber.az saytının məlumatına görə, Lüksemburq təmsilçisinin çalışdırıcısı təmsilçimiz üzərindəki 2:0 hesablı qələbədən də söz açıb: “Azərbaycandakı qələbəyə görə futbolçularıma təşəkkür edirəm. Güclü rəqibə qarşı çətin oyun oynadıq. Yolumuz da kifayət qədər uzaq idi. Amma bütün problemlərə görə biz qalib gəlməyi bacardıq.

Futbolçularım anlayır ki, hələ heç nə bitməyib. Biz yalnız cəmi ilk oyunda qalib gəlmişik, hələ qarşıda cavab görüşü var. Futbolçularıma bildirmişəm ki, ilk oyunun 0:0 bitdiyini düşünsünlər”.

45 yaşlı mütəxəssis Aleksandr Karapetyanın ilk görüşdə iştirak etməməsinə də toxunub: “Siyasət futbola qarışmamalıdı. Karapetyana oyuna çıxmasa da, komanda ilə birlikdə Qəbələyə yollana bilərdi. O, tribunada oturub komandaya dəstək ola bilərdi. Heç kim bizə onu Azərbaycana aparmağı qadağan etməmişdi. Sadəcə qərara aldıq ki, Karapetyan Azərbaycana getməsə yaxşıdı. Cavab görüşündə təbii ki, Karapetyan oynayacaq”.