Samir Abasov: “Uduzmağımıza baxmayaraq, oyundan o qədər də narazı deyiləm”

Topaz Premyer Liqasının III turunda “Sumqayıt” səfərdə “Zirə”yə 1:3 hesabı ilə uduzub. Futbolxeber.az saytının məlumatına görə, oyunsonrası mətbuat konfransında “Sumqayıt”ın çalışdırıcısı yenilgini belə şərh edib:

“Pis oynamırdıq. Birinci hissədə oyuna nəzarət bizim tərəfimizdə idi. Düünürdük ki, ikinci hissədə daha yaxşı çıxış edəcəyik. Əfsuslar olsun ki, buraxdığımız qoldan sonra rəqib bizi əks-hücumda yaxaladı. Uduzmağımıza baxmayaraq, oyundan o qədər də narazı deyiləm. Böyük problem görmürəm. Düşünürəm ki, oyunumuzu zamanla tapacağıq. Çünki yaxşı komandamız var”.

- Bugünkü oyunda qapıçı dəyişikliyi nə ilə bağlı idi?

- Mehdi Cənnətova da şans vermək lazımdır. Çünki sabah Fərhad Əliyev zədə ala bilər. Bugünkü yenilgiyə görə qapıçını günahlandırmaq olmaz. Komandamız oyununu tapa bilmirik. Bunu oyunçuların keyfiyyəti ilə əlaqələndirməzdim.

- Əsasnaməyə görə, protokola 23 futbolçunun adını daxil edə bilərsiniz. Amma siz yenə də matçın iştirak ərizəsində 18 nəfəri qeyd edirsiz...

- Olan futbolçumuz budur. Əvəzedicidən oyunçuları gətirib yalandan ehtiyatda oturmağın mənası yoxdu. Futbolçu baxımından problem çəkmirik.